Os grandes matadoiros deberán instalar sistemas de videovixilancia a partir do 24 de agosto de 2023, unha vez que entre en vigor o decreto aprobado esta semana polo Consello de Ministras e Ministros, publicado esta cuarta feira no Boletín Oficial do Estado (BOE) español. As instalacións deste sector máis pequenas disporán dun ano máis, até 2024, para adaptarse a esta medida.
En total, serán 700 os matadoiros afectados pola medida, segundo confirmou o Ministro de Consumo, Alberto Garzón, nunha entrevista en TVE recollida por Europa Press na a que destacou a importancia deste decreto.
"Nos últimos anos vimos imaxes terríbeis no momento do sacrificio e no traslado dos animais ao longo de corredoiros do matadoiro, o que xerou unha alarma do sector, de colectivos animalistas e de ciudadadanos en xeral e por iso xorde esta norma", explicou Garzón.
O Estado español será o primeiro país da Unión Europea (UE) con sistemas de videovixilancia para o control do benestar animal (SVBA), os cales, permitirán realizar controis adicionais aos que xa se efectúan nos matadoiros, como destaca o Ministerio de Consumo.
Instalación das cámaras
A normativa permitirá estabelecer ferramentas adicionais de control que garantan que, en todos os matadoiros españois (incluídos os móbiles), se minimice o sufrimento animal, por exemplo, durante a descarga, o traslado, a estabulación ou o atordamento.
As cámaras de videovixilancia deberán abarcar as instalacións nas que se atopen animais vivos, incluíndo as zonas de descarga, os corredoiros de condución e as zonas onde se proceda ás actividades de atordamento e sangrado até a morte dos animais.
Os sistemas de videovixilancia non serán obrigatorios nas zonas de espera onde se atopan os medios de transporte con animais vivos antes do inicio da descarga, pero as empresas si deberán levar un control do tempo de permanencia dos animais nos vehículos.
No caso de aves e porcinos, a instalación das cámaras deberá permitir a gravación do escaldado para poder comprobar que non se someten a esta operación animais que presenten signos de vida.
Os responsábeis dos matadoiros deberán gardar as imaxes relativas á descarga, aloxamento nos currais, condución á zona de aturdimento, a suxeición, o atordamento e o sangrado ata a morte para posibles comprobacións a posteriori por parte dos correspondentes servizos de control oficial. Tamén terán que asegurar a reprodución, a copia ou a transmisión das mesmas a outros dispositivos con igual calidade que a gravación orixinal.
