Esta quinta feira viviuse na Galiza un novo episodio dun animal mariño varado nunha praia. Neste caso foi no concello de Sanxenxo, entre as praias de Pragueira e Maior onde apareceu un golfiño.
O animal mostraba abundantes feridas ao longo do seu corpo cuxa orixe se descoñece. A persoa que atopou o golfiño púxose en contacto coa Coordinadora para o Estudo dos Mamíferos Mariños (Cemma) para alertar da situación.
Desde o propio Cemma indicaron que se trata dunha femia de golfino común, Delphinus delphis Linnaeus, que é unha especie de cetáceo odontoceto da familia dos delfínidos. Unha especie que se caracteriza por Ter un corpo esvelto, hidrodinámico, delgado, e un fociño longo.
2023, un ano récord
Como informaba Nós Diario a pasada terza feira, 2023 foi un ano que bateu un infeliz récord. Foi o exercicio en que máis animais varados se encontraron nas praias galegas. 669 animais en total, maior cifra desde que hai rexistros e máis do dobre dos 316 que se contabilizaron en 2022. Foron 592 cetáceos, 12 focas, 25 tartarugas, 30 quenllas e 10 londras.
Do total de animais varados, 64,5% computouse entre A Guarda e Fisterra, mentres que 35,5% produciuse ao norte de Fisterra. Segundo os datos recollidos pola Coordinadora para o Estudo dos Mamíferos Mariños, 42,3% dos cetáceos morreron por capturas de pesca accidental.
Desde o Cemma destacaban que 2023 foi o ano con maior tartarugas computadas desde 2003, cun total de 25, 10 das cales estiveron ou están ingresadas en piscinas de recuperación que cede o Instituto Galego de Formación en Acuicultura (Igafa), dependente da Consellaría do Mar.