Down Galiza sobe ao carro das organizacións que se queixan da erosión dos dereitos sociais coa campaña de recortes emprendida pola dereita española e amparada pola dereita galega. A través dun comunicado, a federación --en que se integran sete institucións de síndrome de Down do país-- manifesta a esperanza de que os axustes orzamentarios do Goberno español "non afecten" ao impulso dos programas de Emprego con Apoio, destinados á inserción laboral das persoas con diversidade funcional.
Até o de agora, estes programas --que levan máis dunha década en vigor-- estiveron apoiados polo Executivo autonómico. Down Galiza lembra no seu escrito que unha persoa que traballa nun Centro Especial de Emprego custa á Administración un mínimo de 7.500 euros/ano durante toda a súa vida laboral mentres que unha persoa que traballa mediante Emprego con Apoio custa o primeiro año 9.000 euros, o segundo 6.000 euros e o terceiro e sucesivos 4.500 euros, o que supón un 36% de aforro a respecto do emprego protexido se tomamos como exemplo unha vida laboral de 20 anos, e un 44% de aforro nunha vida laboral de 30 anos.
Por isto, agardan que desde a Xunta de Galiza non só non se supriman estes programas, mais que se faga "o esforzo para mantela e mellorala". E engaden que as persoas con discapacidade intelectual que traballan na empresa ordinaria non supoñen ningún gasto ao Sistema de Atención á Dependencia (SAAD) e contribúen de xeito activo coas cotizacións ao sistema de Seguridade Social e pagando impostos ao erario público.