Esta terza feira tiveron lugar de novo concentracións de protesta ás portas dos hospitais Montecelo e Provincial, en Pontevedra, convocadas polos sindicatos sanitarios Prosagap, CESM-Galicia e Co-Bas, que acusan o Servizo Galego de Saúde (Sergas) de "manipular descaradamente" os datos de contaxio por COVID-19 nas áreas sanitarias de Compostela e Vigo.
Denuncian que nesas áreas "producíronse caídas insólitas" o día 12 de xuño cando pasaron de 92 a 34 e de 184 a 148 infectados, respectivamente, e unha caída no conxunto de Galicia de 108 casos, que representan 23%, sinalaron.
Os representantes sindicais tamén apuntaron, ademais, que o número mínimo de camas UCI que se esixen para poder saír do estado de alarma atópase entre 1,5 e 2 unidades por cada 10.000 habitantes, unha cociente que, segundo sosteñen, "non se cumpre".
"Durante a maior crise da pandemia en Galicia contamos con 274 camas de coidados intensivos, 114 máis das que había antes da irrupción do virus procedentes dos postos de Reanimación, pero é unha cifra moi afastada das que en realidade se piden, que son 405", indicaron.
CESM Galicia, CO- BAS e Prosagap están convencidos de que "toda esta manipulación obedece a unha campaña de imaxe, por parte do Goberno da Xunta, para as próximas eleccións autonómicas do 12 de xullo".
O doutor Enrique Marra-López, de CESM-Galicia, asegurou que "non" queren "entrar en política". "Queremos falar de sanidade con técnicos, pero estes técnicos están vendidos, son comisarios políticos da xente de Santiago e non atenden a razóns para facer manipulación das cifras para alcanzar o seu obxectivo, que é chegar ás eleccións", lamentou.
Estes sindicatos reprochan ao Goberno galego que "queden no esquecemento" algúns "asuntos e demandas históricas vitais para os profesionais sanitarios" tales como a estabilidade laboral, a modificación da Lei de Ordenación das Profesións Sanitarias ( LOPS), convocar ao Foro Profesional, avanzar no marco Estratéxico de Atención Primaria ou materializar a participación dos pacientes a través dun Consello Asesor.
Dimisión da xerencia
Os representantes das traballadoras da área sanitaria de Pontevedra e O Salnés volveron a esixir a dimisión da Xerencia. Ademais instan ao Sergas a que abra unha mesa de negociación con carácter urxente para abordar todas as súas reivindicacións que seguen "plenamente vivas", subliñaron, e acabar coa situación de "precariedade" que afirman padecer desde fai máis dunha década.
Neste sentido apuntan á "necesidade de aplicar rigorosamente" a Lei de Prevención de Riscos Laborais, a urxencia de contar con máis recursos humanos e mellores condicións de traballo, e o rexeitamento á privatización de servizos non sanitarios, como se recolle no Plan Director do Gran Montecelo, privatizacións polas que piden explicacións públicas á Dirección da área sanitaria.
