Persoal da CRTVG denuncia que a dirección abre expedientes disciplinarios por falta "moi grave" a traballadoras que fan folga

Na mesma mañá na que a folga que desde o pasado 7 de outubro revoluciona a CRTVG chegaba á súa xornada número 19, conseguindo o seu obxectivo simbólico de impedir a emisión do programa externalizado O Termómetro, a Dirección de Recursos Humanos redactaba comunicacións de incoación de expediente disciplinario a dúas persoas traballadoras relacionadas co paro da pasada sexta feira. Eran pouco antes das tres da tarde desta segunda feira cando o comité de folga recibía o aviso da “escalada represiva” por parte das mesmas afectadas, ambas as dúas da rama da iluminación.

Nesas comunicacións, segundo traslada o Comité Intercentros dos medios públicos galegos, conforme ao que prevé o convenio colectivo da CRTVG, o director Victor Tubío Villar informa esas traballadoras —seleccionadas, segundo o comité, “como cabezas de turco”— da recepción dun parte de incidencia emitido polo Subdirector Xeral de Medios, Agustín Deus Sixto, que informa dun incidente ocorrido o pasado día 15 ás 11:30 horas, xusto no inicio da folga, que “afectou a produción do citado programa, que non se puido emitir e obrigou a realizar uns axustes de emisión desde o control de continuidade con programación alternativa”.

“O incidente foi o exercicio do dereito á folga, nas mesmas condicións nas que sempre se practicou na CRTVG e de modo análoga a como o exerceron outros compañeiros e compañeiras folguistas nos numerosos paros” que precederon ao da pasada sexta feira.

“Pois malia toda a experiencia previa e o habitual modus operandi, pretende a CRTVG desta vez facer crer” que ese feito podería tipificarse como unha falta moi grave de “fraude, deslealdade ou abuso de confianza na xestión e no desempeño das funcións encomendadas, prevista no artigo 91.4.7 do convenio colectivo; ou de abuso de autoridade, prevista no artigo 91.4.20 do citado texto”, co único obxectivo, denuncia o comité de folga, de “reprimir e amedrentar o persoal para facer decaer, pola vía do terror empresarial, o libre exercicio do dereito á folga nas mesmas condicións que nunca foron cuestionadas na historia da CRTVG”.

Os sindicatos convocantes da mobilización consideran “gravísimo” este novo chanzo represivo, tanto por basearse nunha farsa tecnicamente “insostíbel” que aseguran decaerá na vía de instrución, como, moi especialmente, por afectar de cheo unha traballadora que reúne dúas características: ser muller e ter un contrato moi precario, unha dualidade que os sindicatos non consideran azarosa cando, até o de agora, e van 19 paros, a empresa non se atreveu a incoar este tipo de expedientes ante incidencias análogas plenamente normalizadas nas folgas da CRTVG.

O comité de folga chama a todo o persoal, e especialmente ás categorías de iluminación, control de cámara, son e operadores de cámara ou cámaras de primeira, a reaxir a esta “intolerábel ameaza, que só ten por obxectivo impedir o exercicio do dereito fundamental á folga e forzar a emisión de O Termómetro no que queda de calendario mobilizador, cunha demostración de forza e de solidariedade cos compañeiros afectados, secundando masivamente o próximo paro que terá lugar esta cuarta feira 20 de novembro. Se tocan a unha, reaccionamos todas”.