A manifestación en defensa dos medios públicos convocada polo Comité Intercentros de CRTVG será o 30 de novembro
O 13 de decembro a folga nos medios públicos galegos será de 24 horas, unha medida coa que as folguistas buscan “aumentar a presión”.
O Comité Intercentros da CRTVG informou de que a manifestación en defensa dos medios públicos que, inicialmente convocaran para o domingo 1 de decembro, terá lugar finalmente o sábado 30 de novembro.
Así o comunicaron esta segunda feira, 19ª xornada de paro na CRTVG, sinalando que o cambio responde a "facilitar a asistencia" á concentración, prevista para as 12 horas en Compostela, con saída na praza Roxa e final en Pratarías.
No comunicado sinalan tamén que levarán a cabo novos paros que comezarán esa mesma fin de semana. O primeiro será o sábado 30 de novembro, de 8 a 15.30 horas, coincidindo coa manifestación. O segundo terá lugar o domingo, 1 de decembro, en horario de tarde, desde as 16.30 horas até medianoite.
Durante o mes de decembro, os paros manteranse en días alternos: segundas, cuartas e sextas feiras, comezando 15 minutos antes (desde as 11.15 até as 13.45 horas); até a sexta feira 13 de decembro. Será este día cando, destacan, "aumentará a presión" coa convocatoria dunha folga de 24 horas, que afectará todas as quendas.
"A partir desa data, na que finaliza a emisión dos 65 programas contratados por 1.040.000 euros, a folga quedará en suspenso até que a dirección da CRTVG decida que fai coa produción externa", indican.
Con todo, confían na "posibilidade" de estabelecer un diálogo que permita "atopar unha solución e arrincar o 2025 coa desconvocatoria do conflito".
