En 27.200 fogares galegos non existen ningunha persoa perceptora dun ingreso salarial ou dalgún tipo de pensión ou prestación por desemprego. Son 3.600 fogares menos que no ano anterior.
Porén, o número de fogares cunha soa persoa per‐ceptora dalgún ingreso económico aumenta no último ano até 475.000, o que supón 2,5% máis que no ano anterior (11.600 fogares máis), e representa xa 42,4% dos fogares galegos, segundo datos do Consello Económico e Social.
En 2022 había na Galiza un total de 359.000 vivendas nas que ningún dos seus membros ten a condición de activo, o que representa 32% do total das vivendas familiares en Galicia, unha de cada tres.
A taxa de risco de pobreza ou exclusión social (Estratexia Europa 2020) descende na Galiza en 2021, para situarse en 18,47%, por baixo da taxa rexistrada no ano 2019.
A análise da taxa de risco de pobreza a nivel de áreas xeográficas reflicte por primeira vez á área de Pontevedra sur (que comprende as comarcas da Paradanta, O Baixo Miño e O Condado), como a que presenta a taxa de pobreza máis elevada con 28,9%, seguida de Ourense sur (A Limia, Baixa Limia, Terra de Celanova, Verín e Viana), que supera 24%. Son as comarcas fronteirizas con Portugal.
A franxa de idade tamén determina a existencia de diferenzas no risco de pobreza. Na Galiza a poboación entre 16 e 24 anos é a que rexistra unha maior incidencia, de modo que 25,6% destas persoas estarían en risco de pobreza ou exclusión social situándose en 20,3% para as persoas de entre 50 e 64 anos e en 22,7% para os menores de 16 anos.
Entre 31 de decembro de 2019 e 2021 a taxa de risco de pobreza e exclusión social redúcese entre os homes e mulleres de 50‐64 anos e maiores de 65 anos, sendo esta redución máis importante entre os homes en ambos os dous casos. Por contra, aumenta no caso dos menores de 16 anos e entre os homes de 16 e 24 anos e entre as mulleres de 25‐49 anos.