A Plataforma Galega en Defensa do Ensino vén de convocar para esta cuarta feira, día 7, diversos actos para protestar polos "recortes" que, denuncian, levou a cabo a Xunta nas últimas semanas. Desta forma, na véspera ao arranque do curso en todas as etapas desde 3 anos, esta plataforma, na que está integrada a CIG, chama ás familias, alumnado e profesorado a unha concentración, ás 11.30 horas, nos diferentes centros educativos para reivindicar o "malestar" debido a eses recortes.
Ese mesmo día, as organizacións que forman parte da plataforma pediron participación para a concentración que se realizará, tamén ás 11.30 horas, diante da Consellaría de Educación no edificio do Goberno galego en San Caetano (Santiago de Compostela). O secretario nacional da CIG-Ensino, Suso Bermello, sinalou en rolda de prensa que "non se descartan outro tipo de mobilizacións" se o Executivo non asumen as súas demandas.
As principais cuestións que reclaman desde a CIG fan referencia ao "recorte" de profesorado, a redución do período lectivo, incrementar as axudas ante a crise económica e a "ineficiencia e falta de previsión" da Consellaría ante o inicio do novo curso.
Recortes no profesorado
A falta de "cifras completas que a Xunta se nega a proporcionar" sobre o profesorado co que contarán as aulas galegas para este curso, a CIG-Ensino sinalou que hai "717 profesores menos con destino provisional, segundo a comparativa de adxudicación definitiva de destinos co curso 2021/22".
Así, Bermello lembrou que no curso pasado a Xunta "recortou 869 docentes", o que cualificou como "a maior redución desde hai máis de 13 anos". Con este dato fixo alusión ás consecuencias que trouxo, entre as que sinalou o fechamento de 59 aulas de Infantil e Primaria, coas que se perderon "uns 100 postos de traballo", e a redución das prazas dos colexios, principalmente en apoio de Infantil e de docentes de Audición e Linguaxe.
No que atinxe á Secundaria, denunciou "un recorte xeneralizado nos postos de traballo" e alegou que se eliminaron "case a totalidade dos desdobramentos anteriores". En consecuencia, apuntou que manter a oferta educativa nalgúns cursos volveuse "imposíbel". Así, a "perda de postos de traballo", segundo o secretario nacional, afecta especialmente Infantil, Primaria, ESO e Bacharelato.
"Segundo os datos oficiais da Xunta hai unha redución de postos de traballo no ensino público e un incremento nos postos privados", remarcou. Para iso, remontouse até 2009 e dixo que "o recorte de profesorado é superior a 10%, mentres que na privada aumentou 6%". "A Xunta concibe a educación como un gasto, non como un investimento", reivindicou.
Condicións de traballo
Con estes "recortes" en materia de profesorado, as condicións de traballo tamén se ven afectadas. Desta forma, determinou que neste curso 2022-23 a porcentaxe de mestres e mestras que terán que aplicar materias afíns ou distintas á súa especialidade verase "incrementado en 2%" a respecto do curso anterior.
Así, en Infantil e Primaria medrou a "profesora itinerante", é dicir, a que imparte docencia en varios centros. "Especialmente preocupante en Orientación Educativa, na que máis da metade das e dos docentes provisionais atenden varios centros", precisou.
Outra cifra que puxo sobre a mesa fai referencia ao profesorado interino, do cal sinalou que "se reduciu a máis de 1.225 docentes". As principais accións que dan lugar a isto, segundo Bermello, son "os efectos dos recortes, as prazas das oposicións e a negativa de que o profesorado recupere o horario de 18 períodos lectivos en Secundaria e 21 en Primaria". "A Galiza pasou nestes anos para ter o persoal docente coas mellores condicións en canto a horario lectivo, a ser unha das peores", lamentou Bermello.
Medidas fronte á crise
Para este período académico, algúns cursos teñen que cambiar os libros de texto, segundo a nova Lei educativa, a Lomloe, e haberá familias que non poidan facer fronte a ese gasto, advertiron desde a CIG: "O PP español reclame a gratuidade dos libros de texto cando foi Feixoo o encargado de quitar esa medida na Galiza".
Sobre os gastos, Suso Bermello tamén fixo referencia aos comedores escolares, xa que neste inicio de curso "a pesar do aumento dos alimentos non se fala de ningún incremento de axudas para poder facer fronte a ese gasto". Outro dos factores que "preocupa desde os centros" son os gastos de funcionamento, "que poderían dispararse até facelos inasumíbeis", co cal urxiu "unha solución da Xunta" en canto a gastos básicos dos centros educativos.
