A concesionaria da AP-9, Audasa, xa pensa a súa estratexia no caso de que perda a xestión da autoestrada e, polo tanto, os ingresos polas portaxes. Esta cuarta feira estimou en máis de 1.000 millóns de euros a indemnización que reclamará ao Estado español no caso de que o procedemento de infracción aberto pola prórroga na concesión remate coa liberación da infraestrutura.
A compañía, que xa ten reclamada unha compensación pola caída dos ingresos derivada do parón no tráfico rodado durante o estado de alarma, aludiu así ao procedemento de infracción aberto pola Comisión Europea contra España por incumprimento da normativa comunitaria ao autorizarse a última prórroga desta infraestrutura sen unha licitación pública.
O que parece unha ameaza aparece recollido nun folleto remitido á Comisión Nacional de Mercado de Valores (CNMV) a finais do mes de outubro con motivo dunha emisión de obrigacións (que ten previsto facer este mes, por importe de 300 millóns).
Desde o seu punto de vista, esa compensación "sería superior ao importe actual da súa débeda". Ao feche de 2020 o seu endebedamento bruto situábase en 1.065 millóns de euros, segundo figura no mesmo escrito.
Contexto do conflito
Estas declaracións xorden despois de que a Comisión Europea anunciara o pasado 23 de setembro a apertura de expediente a España pola extensión até 2048 da concesión da autoestrada galega sen abrir unha licitación pública.
Bruxelas enviou unha carta de emprazamento, o primeiro paso nos procedementos comunitarios de infracción, ás autoridades españolas para garantir a correcta aplicación da regulación europea na concesión de contratos, ao considerar que España non cumpriu coas súas obrigacións nesta materia.
En concreto, o Executivo europeo considera que a última ampliación da concesión da AP-9, que ampliará o pago de peaxes até 2048, non se fixo de acordo á lexislación europea. Esta cuestión xurde a partir dunha denuncia da asociación galega En Colectivo polo pago das portaxes.
Previsión de acontecementos
Pola súa banda, este escrito á CNMV tamén detalla os pasos para seguir polo procedemento de revisión aberto pola Comisión Europea (CE). De tal modo, tras a carta de emprazamento, se a CE chega á conclusión de que o Estado non cumpre as súas obrigacións, pode enviar un ditame motivado, é dicir, "unha petición formal para que se dea cumprimento" á lexislación europea. No caso de que o Estado manteña o incumprimento, a CE pode remitir o asunto, mediante demanda, ao Tribunal de Xustiza da UE ( TXUE).
De tal modo, se o TXUE fornece un auto no que considera que España infrinxe a normativa europea, o Estado "poderá adoptar ou non aquelas medidas que considerase adecuadas para axustarse á sentenza". É aquí onde Audasa advirte de que se deberá indemnizar á compañía en caso de saír prexudicada.
