O director do diario dixital de extrema dereita La Tribuna de Cartagena, Josele Sánchez, foi condenado a tres anos de prisión por difundir datos e a foto da violación da vítima da 'Manada'.
O xornal que Sánchez dirixe publicou un artigo titulado Eu non te creo no cal culpaba a vítima de ser "unha borracha" que "buscaba" o que lle aconteceu.
O delito
Este artigo, baseado nos feitos das festas de San Fermín de Pamplona durante a madrugada do 7 de xullo de 2016, supón un delito contra a integridade moral xunto cun de descubrimento e revelación de segredos, segundo afirma o titular do xulgado do Penal número 2 de Cartaxena.
O xuíz conclúe que Josele Sánchez, que tamén difundiu os datos persoais da vítima "vexou gravemente" a moza con "ánimo de causarlle dano" cando escribiu o 4 de maio de 2018: "Mira, nena, eu non te creo. Ti non dixeches ‘NON’ en ningún momento”.
"Efectivamente, non te violaron […]. Irse con cinco tipos a un hotel non é para xogar ás cartas", escribía Sánchez.
"Expresións vexatorias"
"As expresións son claramente vexatorias, pero sobre todo é patente tal carácter na publicación do nome, apelidos, domicilio, centro de estudos universitarios da vítima, etc, debido a que desde logo carecen por completo de relevancia para a opinión remitida", conclúe o maxistrado na súa resolución.