A praia da Canteira da Illa de Arousa (O Salnés) rexistrou un episodio de mortaldade masiva de navallas, longueiróns e ameixas, entre outros, que provocou a preocupación da confraría e o sector. Na comisión de Pesca do Parlamento galego, o deputado socialista Julio Torrado preguntou á Xunta, no marco dunha intervención sobre marisqueo, a respecto deste episodio de mortaldade "enorme" sufrido a pasada fin de semana, pois apunta que están "moi preocupados" na confraría.
"Fáltalles por dicir que somos os socialistas os que imos matando marisco en campaña", queixouse Torrado. Igualmente, referiuse a que diferentes colectivos como a Plataforma en Defensa da Ría de Arousa (PDRA) alertaron recentemente de perdas por valor de até 25,7 millóns en 2022, cunha caída da produción de ameixa e berberecho.
En resposta, a directora xeral de Desenvolvemento Pesqueiro do Goberno galego, Susana Rodríguez, sinalou que as navallas "morren en campaña cando as campañas son no verán, claro", xa que se produce un "aumento de temperatura". Aliás, acusou o Goberno estatal de "paralizar" sete proxectos de confrarías de rexeneración para o marisqueo, entre eles o impulsado pola Confraría da Illa de Arousa, aos que "non se deixa botar áridos nin rexenerar" e que "van perder zona produtiva". "Por que non se autoriza ás confrarías de pescadores a rexenerar esas zonas?", pregúntase.
Apunta que da última convocatoria de axudas hai 24 solicitudes —por 750.000 euros— para rexenerar 2,5 millóns de metros cadrados este ano, entre os que se inclúen eses sete proxectos —por máis de 300.000 euros— "pendentes de executar" porque os permisos que se concedían desde 2017 por parte do Goberno "non están a ser concedidos".
O BNG cuestiona o papel da Fundación Galicia Europa
Noutra orde de asuntos e tamén nesta comisión, a deputada Rosana Pérez (BNG) cuestionou o papel da Fundación Galicia Europa, á que acusou só de servir como oficina en Bruxelas para o "lucimento dos conselleiros de quenda", pero sen exercer un papel de "lobby de presión" que se necesita "como auga de maio na problemática de sector pesqueiro".
Critica que esta fundación non traballase para que "se conseguise suavizar ou tentar paliar a dureza dunha decisión moi desacertada e sen base científica" de veto ao arrastre. E é que considera 800.000 euros de orzamento para esta oficina "pode parecer até excesivo" se "non saca rendemento".
En resposta, o director xeral de Relacións Exteriores e coa UE, Jesús Gamallo, defende o "seguimento exhaustivo" de política pesqueira que realiza a Fundación Galicia Europa, que traballa de man da Consellaría do Mar para "reforzar" a posición galega ante as institucións europeas.
Entre outras tarefas, destaca o traballo no ditame do Comité Europeo das Rexións (CdR) sobre o futuro do sector pesqueiro na Unión Europea, á vez que resalta o labor de "asesorar" a Consellería do Mar e nos contactos con diferentes institucións europeas. Define a esta entidade como "a correa de transimisión" para explicar en Bruxelas a posición da Galiza. "Creo que se está facendo moi ben", asegura Gamallo.
Observatorio Costeiro
Noutra pregunta, realizada polo PPdeG, a directora do Instituto Tecnolóxico para ou Control do Medio Mariño (Intecmar), Covadonga Salgado, deu conta do traballo de máis dunha década do Observatorio Costeiro da Galiza, "fundamental" para a xestión de emerxencias no mar, o desenvolvemento sostíbel, produtos de valor engadido, así como datos e predicións de calidade para a investigación.
Así, subliña a súa "utilidade" en diferentes ámbitos: información do estado do mar en tempo real para seguridade marítima, predicións para 'percebeiro' con tres días de antelación en máis de 1.000 puntos, apoio a loita anticontaminación con modelos de simulación de traxectoria de verteduras, así como para as probabilidades de que lixo chegue a determinadas áreas, entre outros.
Ademais, Salgado valora que os seus indicadores serven para previr mareas vermellas e o cambio climático. Pon de exemplo que o Observatorio Costeiro da Galiza detectou temperaturas en augas de Cíes "moi altas" o pasado mes de xuño.
