O xuíz que investiga o 'caso Pegasus' vén de citar a ex directora do CNI Paz Esteban a declarar como investigada a cuarta feira 13 de decembro ás 9 horas. O Xulgado de Instrución número 29 de Barcelona tomou esta decisión a raíz da petición que fixo o president da Generalitat de Catalunya, Pere Aragonès, que se querelou por esta trama de espionaxe.
No mesmo auto, o xulgado citou Aragonès a declarar como prexudicado o mesmo día, ás 9.30 horas. Aragonès presentou a querela en xullo de 2022 polos presuntos delitos de intrusión non autorizada en equipos informáticos, de intercepción ilegal de comunicacións, de espionaxe informática e de produción e adquisición para o uso de spyware, así como "outros delitos contra os dereitos fundamentais".
O xuíz tamén reclama ao CNI información sobre a compra e posíbel uso do software, así como se ten licenza de uso e se posúe en exclusiva as facultades de autorización do seu uso no Estado español. Intelixencia tamén terá que aclarar que mercantil comprou a licenza, quen actuou en nome do CNI ao encargar e comprar o software e aclarar "se fixeron uso" de Pegasus con relación a Aragonès.
No mesmo auto, o xuíz acorda oficiar ao Tribunal de Contas para que certifique se o CNI comprou licenzas a NSO Group ou a Osy Technologies, e que detalle estes produtos ou servizos e a data na que se adquiriron. Tamén decidiu librar un exhorto ao maxistrado do Tribunal Supremo responsábel do control xudicial ao CNI para que certifique sui autorizou o uso do software para espiar Aragonès. No mesmo auto o xuíz pediu á Fiscalía que se posicione antes da cuarta feira sobre se prorrogar a instrución de caso outros seis meses.
Reclamacións á comercializadora
A querela de Aragonès tamén se dirixe contra a empresa Osy Technologies, vinculada a NSO Group, propietaria do software Pegasus. O xuíz pediu unha orde europea de investigación para entregar unha copia do auto traducida ao francés na sede da empresa en Luxemburgo para que designe un representante legal para a causa.
Este representante deberá certificar se a mercantil ou o grupo empresarial comercializaron Pegasus, se o venderon a organismos gobernamentais do Estado español e, no caso de que o fixesen, identificar as persoas que actuaron como representantes no encargo e a compra do software. O xuíz tamén pide á mercantil aclarar se conserva datos ou rexistros sobre do funcionamento de Pegasus a mans de organismos gobernamentais españois, e se os ten ordena entregalos ao xulgado.
Ademais, reclama que a empresa especifique quen son os administradores, directores e representantes da mercantil para tomarlles declaración se for preciso, e que certifiquen se contan cun sistema de prevención de riscos penais.
