A candidata de Sumar ao Congreso pola circunscrición da Coruña, Marta Lois, asegurou este domingo que a formación que lidera Yolanda Díaz aposta por "recuperar e nacionalizar a AP-9". En declaracións aos medios desde unha ponte que cruza a autoestrada ao seu paso por Santiago, Lois afirmou que é "unha anomalía" que a AP-9 siga a ser de peaxe e "que vaia estar así até o ano 2048".
Acompañada dos seus compañeiros de lista Manuel Lago e Borja San Ramón, a candidata de Sumar lembrou que desde 2019 e até 2026 "vaise recuperar un número moi importante de autovías de peaxe", polo que considera que a situación da autoestrada galega é "unha auténtica anomalía".
Así, fixo memoria e explicou que a concesión da AP-9 debía rematar en 2012, mais "unha serie de prórrogas, a máis importante co señor Aznar", fixeron que a concesión se estendese até 2048. "É inaceptábel tanto para a ordenación do territorio como desde o punto de vista da mobilidade", insistiu.
Por iso, manifestou que Sumar é "moi claro" e non quere "parches, nin medidas ineficientes, nin parciais". "Os galegos teñen que saber que esta concesión até o ano 2048 significa que o Estado vai pagar bonificacións que ascenden a 2.300 millóns de euros. Unha auténtica barbaridade", censurou.
Nesta mesma liña, reiterou que é "inaceptábel" levar 75 anos baixo a xestión dunha empresa privada, Audasa, "cun case monopolio da xestión dunha autovía de peaxe mentres centos de quilómetros de autovías do resto do Estado están a recuperarse para a administración pública".
"Non queremos medidas ineficientes, non queremos medidas parciais, senón que queremos unha idea moi clara: recuperar e nacionalizar a AP-9, facer desa subvención unha transformación en investimento e despois, por suposto, transferila ao Goberno galego", proclamou.
