O portavoz no Congreso e cabeza de lista do BNG para as eleccións do 23-X, Néstor Rego, presentou este sábado nas Pontes as propostas en materia de xestión de enerxía eléctrica e asegurou que un grupo forte nacionalista pode ser clave para a aprobación dunha tarifa eléctrica galega.
Ademais, Rego defendeu un concurso de transición enerxética nas Pontes e un modelo racional de xeración de enerxía que poña fin ao espolio eólico.
O candidato do BNG pola Coruña nas eleccións do 23-X escolleu o concello das Pontes para presentar distintas propostas sobre o modelo enerxético que defendeu xa no Congreso e que aspira a conseguir na próxima lexislatura, "cun grupo galego forte en Madrid".
Xustiza social e económica
Néstor Rego insistiu en que a tarifa eléctrica galega é unha cuestión de xustiza para o noso país, máis aínda nun momento de crise social e económica, crise de prezos provocada, entre outras cousas, pola suba do prezo da electricidade.
"Precisamos unha nova regulación para que a enerxía fique baixo control público para poñela ao servizo do noso país e que reduza nun terzo a tarifa que pagan as familias e as empresas, desta maneira será moito máis competitiva", apuntou.
Traballaremos para que a transición ecolóxica e enerxética se faga con xustiza social
O portavoz no Congreso lembrou que o BNG reclamou a tarifa eléctrica galega porque, ao seu ver, é necesaria nun país excedentario que leva décadas pagando as consecuencias ambientais e sociais e é "xusto tamén que se beneficie desta condición cunha tarifa propia".
Rego lembrou que non só é unha reclamación do BNG senón que, tamén o presidente en funcións de Aragón, Javier Lambán, reclamou unha tarifa propia "e Pedro Sánchez respondeu que lle parecía razoábel, e nós dicímoslle que máis será para Galiza".
Concurso de transición xusta
O candidato nacionalista comprométese a "insistir no Congreso con esta proposta e farémolo con máis capacidade, con un grupo galego que defenda os intereses de Galiza e leve á práctica a posibilidade de que o noso país teña unha tarifa máis barata que beneficie a poboación e o sector económico".
Ademais, Néstor Rego presentou a súa aposta por un modelo de xeración de enerxía máis racional, co fin de pór fin ao espolio eólico, minimizando o impacto en función das necesidades do noso país. "Traballaremos para que a transición ecolóxica e enerxética se faga con xustiza social", apuntou, para o que defendeu un concurso de transición xusta para As Pontes, que está a sufrir s consecuencias do peche da central térmica. "Precisamos un concurso de transición xusta, como o que se fixo en Andorra, que supuxo a implantación de novas actividades con investimento millonario e a creación de novos postos de traballo. Iso é o que reclamamos para As Pontes", afirmou Rego.
Estes tres eixos do modelo enerxético do BNG poderán ser realidade, segundo defendeu o candidato nacionalista, cun "grupo forte que non só continúe a ser a voz da Galiza senón que poida condicionar as maiorías, que teña capacidade decisiva".
