12 de xaneiro, data do falecemento de Ramón Sampedro, non será declarado Día da Morte Digna na Galiza. A demanda que desde hai anos defende a Asociación Dereito a Morrer Dignamente da Galiza e que foi defendida esta terza feira como iniciativa no Parlamento galego polo BNG, e apoiada polo PSdeG, topou co veto do PP. A proposta non se votará até hoxe na sesión plenaria mais esta terza feira a deputada popular Marta Rodríguez-Vispo adiantou o sentido do voto do seu grupo durante o debate da proposta. "O PP non o ve necesario, xa existe unha data a nivel internacional para a morte digna, 2 de novembro", dixo a parlamentaria.
Botaba así o fecho a unha demanda, recoñecer o 12 de xaneiro como Día da Morte Digna na Galiza, que ao longo destes anos logrou o apoio de diferentes organizacións e entidades, así como da Federación galega de Municipios e Provincias (Fegamp). "Que lles pasou a vostedes desde 2015?", preguntou Montse Prado (BNG) ás bancadas do PP, citandom o ano en que a Cñ´´amara aprobara por unanimidade a Lei 5/2015 de dereitos e garantías da dignidade das persoas enfermas terminais da Galiza. "O que pasou", respondeu ela propia, "é que temos un PP instalado no radicalismo ultra e en retroceder en dereitos".
Prado foi a encargada de defender a iniciativa. Lembrou que a loita por unha morte digna "non foi doada" e que na Galiza non se pode desligar de Ramón Sampedro, mariñeiro que ficara tetrapléxico en 1968, con 25 anos, e que desde entón defendeu o seu dereito a morrer con dignidade, o que consegiu 12 de xaneiro de 1998, hai 25 anos.
Neste tempo, sinalou a nacionalista, "a sociedade avanzou na súa transformación, no recoñecemento da súa pluralidade moral e na secularización da vida e a conciencia social, no desenvolvemento de dereitos, na creación de recursos públicos, no funcionamento democrático das institucións, no recoñecemento e respecto á autonomía das persoas, e nos recursos tecnolóxicos”.
Froito diso, en 2015 aprobouse na Galiza a lei antes menci9nada e en 2021 no Estado a Lei da Eutanasia. Montse Prado defendeu que aínda "fica camiño por avanzar". Unha opinión que partillou o portavoz do PSdeG no debate, Julio Torrado. "As leis chegaron tarde e son mellorábeis, cómpre avanzar", sinalou, incidindo en que a eutanasia "é un dereito, non unha obriga". Torrado chamou a "respectar o dereito das persoas a decidir, e a Lei da Eutanasia é unha lei respectousa", un exemplo da "política útil", dixo, que fan "os gobernos de progreso".
58 solicitudes en dous anos
Rodríguez-Vispo defendeu "o dereito á boa morte, aquela sen dor e sufrimento" e indicou que na Galiza "aplícanse con normalidade" tanto a lei de 2015 como a de 2021. A deputada popular forneceu varios datos. Entre xuño de 2021 —aprobación da Lei da Eutanasia— e mediados de 2023 houbo no país 58 solicitudes de eutanasia. En canto á patoloxía que sufrían os pacientes que solicitaron a morte digna, a principal era neuroloxica (50%), seguida da oncolóxica, con 31%.
