Os resultados das municipais deste domingo, extrapoladas ao mapa dunhas eleccións galegas, deixarían un PP sen maioría absoluta no Parlamento de Galiza. Dos 41 parlamentares que ten na actualidade pasaría a ficar con 35. Por contra o PSOE aumentaría de 18 a 24 representantes. O BNG, que na actualidade ten sete escanos, pasaría ter tres máis, atinxindo 10. E a isto hai que engadir que habería 5/6 parlamentares en representación das marés cidades e candidaturas de confluencia.
Claro está, estes son resultados da extrapolación das municipais ás autonómicas, dúas citas coas urnas con dinámicas e axentes diferentes. Así, nestas municipais non concorreu AGE como tal -formación que ten 9 escanos no Parlamento de Galiza-. E as marés e candidaturas ‘municipalistas’ non estiveron presentes en todos os concellos do País, senón que ficaron por baixo dun terzo dos municipios. Nunhas eleccións galegas non se daría ese ‘escenario’. Sobre a mesa, a incógnita do que faría Podemos, que este domingo si compareceu coa súa marca nas autonómicas decorridas conxuntamente coas municipais.
Malia todo isto, esta extrapolación permite visualizar na Cámara galega o crítico momento eleitoral que vive o Partido Popular, que obtén o peor resultado da súa historia en eleccións deste tipo na Galiza, repetindo a mesma percentaxe, o 35%, obtida nas europeas de maio pasado.
