As portas xiratorias levan pairando sobre os comicios galegos desde o comezo da campaña. No debate electoral organizado pola CRTVG na segunda feira de 5 de febreiro, a candidata de Podemos á Presidencia da Xunta da Galiza, Isabel Faraldo, apuntaba directamente a Beatriz Mato, conselleira de Traballo e Benestar nos dous primeiros gobernos de Alberto Núñez Feixoo e conselleira de Medio Ambiente entre 2015 e 2018, que pasou á dirección da eléctrica Greenalia en 2020 após unha tentativa frustrada de alcanzar a Alcaldía da Coruña co PP.
A participación da área de Mato en expedientes referidos a Greenalia resultou unha práctica habitual nos seus anos á fronte da Consellaría de Medio Ambiente. Por exemplo, en 2017, a Xunta da Galiza outorgou á empresa Greenalia diversas autorizacións legais para pór en funcionamento a central de biomasa en Teixeiro (Curtis). O 26 de abril de 2018, o Consello da Xunta, do que facía parte Beatriz Mato, declaraba de interese especial os parques eólicos de Campelo e Bustelo (Coristanco, Carballo e Santa Comba), promovidos pola empresa Greenalia, actualmente paralizados pola xustiza.
Quitar a cadeira ás eléctricas
A presenza de antigos conselleiros e responsábeis políticos do PP nos postos de dirección das eléctricas pódese seguir en diversas compañías con actividade na Galiza. A este respecto, a candidata do BNG á Presidencia da Xunta da Galiza, Ana Pontón, ten reiterado en diversos actos da campaña a vontade da súa organización de "quitarlle a cadeira do Consello da Xunta ás eléctricas". Outra conselleira de Feixoo presente no consello de administración dunha eléctrica, neste caso Ecoener, é Marta Fernández Currás, que após exercer como responsábel de Facenda do Goberno galego entre 2009 e 2012 foi nomeada por Raxoi secretaria de Estado de Orzamentos.
Antonio Couceiro e Carlos del Álamo son outros dous antigos conselleiros dos Gobernos do PP na Galiza con responsabilidades en empresas con intereses no sector enerxético. O primeiro senta no consello de administración de Greenalia desde 2017, tras ocupar a Consellaría de Industria e Comercio entre 1994 e 1997, anos chave para o desenvolvemento do negocio eólico. O segundo ocupou un posto na dirección de Ence, empresa centrada na produción de pasta de papel e de enerxía, tras exercer de director xeral de Montes da Xunta entre 1990 e 1996 e de conselleiro de Medio Ambiente entre 1997 e 2003.
As portas entre o sector enerxético e o PP chegan a outros niveis inferiores da administración galega, como o caso de Joaquín del Moral Crespo, que foi conselleiro en Somozas Energías Renovables e director xeral de Industria da Xunta da Galiza entre 1990 e 1999, e o seu sucesor, Ramón Ordás, que tras saír do Goberno galego en 2005 foi nomeado director de Endesa en Portugal.
