Quedando poucas horas para o inicio do proceso de desconfinamento, a portavoz nacional do Bloque Nacionalista Galego, Ana Pontón, pediu ao presidente da Xunta da Galiza, Alberto Núñez Feixoo, “acertar” para non tirar pola borda todo o esforzo realizado polas galegas e galegos "ao longo destas durísimas semanas", dixo.
“Acertar no desconfinamento é vital”, subliñou esta sexta feira, 8 de maio, a líder nacionalista. "Non podemos arriscarnos a perdelo todo porque o Goberno de Núñez Feixoo non fixera os deberes, pese a que hai moito en xogo”, recalcou.
Nese sentido, Ana Pontón propuxo tres medidas que considerou urxentes para un desconfinamento seguro. A primeira consistiría na distribución "masiva e gratuíta de máscaras entre a poboación porque está demostrado que é un elemento que protexe do contaxio", remarcou a portavoz nacional do BNG.
Un plan para o rastrexo do coronavirus
A segunda medida formulada polo Bloque sería a posta en marcha dun "plan de rastrexo" do coronavirus co obxectivo de "controlar a evolución do virus, con persoal sanitario específico". A este respecto, Pontón remarcou que “non se trataría de sobrecargar aínda máis o persoal da Atención Primaria, senón de anticiparse a posíbeis rebrotes”.
Precisamente sobre a Atención Primaria vai a terceira medida defendida polos BNG para o desconfinamento. Pontón exixiu reforzar con 200 millóns de euros a Atención Primaria, pois considerou que "vai ser a punta de lanza para loitar contra o virus nesta fase do desconfinamento".
A portavoz do Bloque Nacionalista Galego insistiu en que, para non botar por terra o logrado co distanciamento social e físico de todos estes días, Alberto Núñez Feixoo "ten que facer a parte do traballo que lle corresponde como presidente da Xunta da Galiza porque non é o momento de situarse de perfil, nin de botar balóns fóra”, sinalou Pontón. A líder nacionalista instou, de feito, ao mandatario galego a "achegar solucións" e pór en marcha medidas como as expostas polo Bloque que permitan afrontar "coas máximas garantías posíbeis" as etapas que veñen por diante.