Pilar Rojo actuou esta cuarta feira como delegada rexia para efectuar a ofrenda na misa solemne que recordou a translación dos restos do Apóstolo Santiago. Fíxoo na súa condición de presidenta do Parlamento galego, cargo do que se despide para pasar ser unha deputada no Congreso español. E Pilar Rojo semella que quixo que a súa despedida non pasase desapercibida. Criticou no seu discurso o laicismo dos cargos públicos. “O espírito constitucional, ancorado no principio de non confesionalidade, é diferente ao laicisimo, un principio que non contempla a nosa Carta Magna", sinalou Rojo. Unha referencia aos alcades de Coruña, Compostela e Ferrol, que non asisten como representantes públicos a actos relixiosos.
"Non podemos seguir tolerando a persecución que sofren os cristiáns" dixo Pilar Rojo, afirmando que "a liberdade relixiosa é un dereito fundamental". Rojo actuou como delegada rexia nesta cerimonia por segunda vez posto que xa o foi no ano 2012, no que invocou ao Apóstolo para atopar as mellores solucións para a crise. Esta cerimonia relixiosa, que se comezou a celebrar en 1109, ten lugar todos os días 30 de decembro, en lembranza do traslado dos restos do Apóstolo desde o porto de Jaffa, en Palestina, ata as costas galegas.
Imaxes: Pepe Ferrín (Parlamento)