“Hoxe lévovos até Penacova, o meu sitio favorito de Chorente”, anunciou esta segunda feira Ana Pontón nas súas redes sociais, nas que compartiu un emotivo vídeo no que ela, o seu pai, Luís, e a súa filla, Icía, percorren este lugar de Sarria na súa aldea natal.
No audiovisual, a candidata do BNG a presidir a Xunta da Galiza rememora tempos pasados no lugar co seu proxenitor, que recorta o intenso traballo que realizaba nas leiras. “Ás veces, cando tocaba ir á fabrica ás seis da mañá, xa tiñamos dous ferrados de terra arados”, lembra Luís.
Hoxe lévovos ata Penacova, o meu sitio favorito de Chorente.
Alí o meu bisavó plantou un souto para todos os que viñamos detrás, aínda que nunca chegou a ver os seus froitos. A política para min é similar, traballamos pensando nos que que virán.#ÉAgora pic.twitter.com/EJAgAwzwti— Ana Pontón (@anaponton) February 12, 2024![Publicidade 196064]()
“Pois eu acórdome moito de cando viñamos aquí, cando viñamos á leña, ás castañas. Moito cambiou isto, verdade?”, pregunta Ana desde Penacova, o lugar, segundo conta, onde cando era pequena quería para construír unha casa.
“Agora non a faría. Pero gustábame moito vir aquí, parecíame un sitio que daba moita paz, moita tranquilidade”, engade.
Alí, en Penacova, o bisavó de Ana Pontón plantou un souto, “para todos os que viñamos detrás”, explica a candidata. “Aínda que nunca chegou a ver os seus froitos. A política para min é similar, traballamos pensando nos que virán”, conclúe.
Con esta mensaxe comeza Pontón a última semana da campaña electoral coa que aspira a presidir a Xunta da Galiza.
