O mediador era Juan Mari

Para asegurar a investidura de Pedro Sánchez, o PSOE enviaba a Bruxelas a Santos Cerdán, secretario de Organización, para entrevistarse con Puigdemont. Entre os acordos estaba a designación do chamado verificador, cuxo nome foi o segredo mellor gardado: Francisco Galindo-Vélez, diplomático salvadoreño. Inmediatamente Feixoo e Ayuso tentaron desacreditar esta persoa manifestando que fora negociador entre o goberno de Colombia e a guerrilla das FARC. Demostrouse que era falso porque non fixo de mediador, senón que era embaixador de El Salvador en Bogotá entre 2016 e 2020, diplomático de recoñecido prestixio. É un experto en refuxiados e foi Alto Comisionado de Nacións Unidas para os Refuxiados (Acnur). O PP negocia con ETA O PP foi moi crítico coa negociación do PSOE con Junts para a investidura de Sánchez, pero tivo reunións clandestinas con Junts despois de manifestar Borja Sémper: "Imos reunirnos con todos os grupos parlamentarios, salvo Bildu". Para González Pons, "a tradición e legalidade de Junts non está en dúbida". Feixoo cualificaba o acordo do PSOE con Bildu como o "pacto encapuchado". Pero lembremos a historia das negociacións do PP con ETA, onde os protagonistas non eran "encapuchados". Juan María Uriarte foi o mediador oficial, como o verificador actual, nas conversas do Goberno de Aznar con ETA entre 1998 e 1999 ETA asasinaba Miguel Ángel Blanco o 13 de xullo de 1997. Sete meses despois, o 3 de marzo de 1998, o presidente Aznar declaraba: "Se os terroristas deciden deixar as armas saberei ser xeneroso". "Aznar abre o diálogo con ETA", titulaba El Mundo do 4 de novembro de 1998. Asinábase o pacto de Lizarra-Garazi entre ETA e as forzas abertzales, ETA declaraba unha tregua o 16 de setembro de 1998 e oito meses despois, 19 de maio de 1999, o Goberno de Aznar enviaba unha delegación a Zurich para negociar con ETA na que estaban Pedro Arriola, asesor de Aznar; o xornalista Javier Zarzalejos e Ricardo Martí Fluxá, número dous do Ministerio de Interior dirixido por Jaime Mayor Oreja. Esa delegación do goberno do PP tiña outra reunión con Batasuna (participaban Arnaldo Otegi, Pernando Barrena, Rafael Díez Usabiaga e Iñigo Iruin) nun chalet de Juarros (Burgos), como informaba o xornal Gara. Estas reunións eran tan "oficiais" que a delegación de Batasuna chegaba ao lugar do encontro escoltada pola Garda Civil. Aznar tiña moito interese en falar con ETA, que xa non é definida como organización terrorista: "Autoricei contactos co Movemento de Liberación Vasco". "A independencia vasca é lexítima se non se impón pola forza", declaraba Aznar en Radio Nacional o 16 de maio de 2001. Despois do referendo de autodeterminación do 1 de outubro de 2017, o presidente Rajoy estaba moi interesado en frear o proceso de independencia e propuña ao presidente Puigdemont suspender a aplicación do artigo 155 da Constitución se non había declaración unilateral de independencia, que era recollido así na portada de ABC do 19 de outubro de 2017: "Rajoy ofrece 'Amnistía' a cambio de eleccións legais". Para facilitar esa negociación con ETA, o goberno do PP ordenaba o traslado de máis de 120 presas e presos de ETA a cárceres de Euskadi entre setembro de 1998 e setembro de 1999. Deputados do PP como Ignacio Gil Lázaro (agora dirixente de Vox) defendían no Congreso en 1999 as negociacións con ETA e esa política penitenciaria: "Pola paz o presidente impulsou un conxunto moi importante de iniciativas". Por outra parte, dirixentes do PP que viviron en Euskal Herria teñen claro que ETA é cousa do pasado. Borja Sémper, portavoz do PP, manifestaba: "Bildu non é ETA, o importante é que ETA acabou. O futuro ten que construírse tamén con Bildu". Outros dirixentes do PP como Javier Maroto, alcalde de Vitoria e hoxe vicepresidente do Senado, non pechaba as portas a posíbeis acordos con Bildu: "Non me tremen as pernas por chegar a acordos con Bildu. Oxalá se estenda o exemplo". O mediador era un bispo Juan Mari era un crego moi querido para a mocidade da parroquia de San Inazio en Bilbao, onde eu vivía. A parroquia era un lugar de encontro e de ocio para a mocidade (había xogos, unha "ra", tenis de mesa). A outra opción era un local do Fronte de Xuventudes e para entrar había que levantar o brazo e dicir 'Arriba España!' Nunha manifestación do Día da Patria en Compostela saudei a Juan Mari cando estaba sentado nunha terraza con outros bispos. Díxome: "Viñestes á manifestación?"; Non, eu xa estou aquí desde 1969. Sabiamos que chegaría lonxe e Juan María Uriarte, que agora ten 90 anos. Foi bispo auxiliar de Bilbao, despois bispo de Zamora (1991-2000) e de San Sebastián (2000-2009). Juan Mari foi o mediador oficial, como o verificador actual, nas conversas do Goberno de Aznar con ETA durante a tregua de catorce meses entre 1998 e 1999. Esta información é secuestrada porque agora o discurso oficial do PP é que non se pode falar con Bildu porque son o mesmo que ETA.