O BNG comprometeuse en Pontevedra esta cuarta feira 17 de agosto, Día da Galiza Mártir, a poñer en marcha a elaboración dunha “ lei galega da recuperación da Memoria histórica, o recoñecemento das vítimas e a reparación das persoas represaliadas polo franquismo”. Un compromiso para “facer xustiza e acabar coa lousa do silencio”.
A candidata nacionalista, Ana Pontón, asegurou que resulta urxente un novo “estatus político para Galiza” e reivindicou o nacionalismo como impulsor dos procesos de modernización e loita pola democracia e defensa dos intereses e dereitos do noso país.
O cabeza de lista do BNG pola provincia de Pontevedra, Luís Bará defendeu a creación dun Arquivo Público da Memoria da represión e da resistencia a partir dos materias recollidos no proxecto Nomes e voces así como recuperar o “Consello pola Memoria” como órgano de participación social no impulso e seguimento das políticas públicas da memoria”.
Por un cambio real
A candidata do BNG consideraq ue o 25S abre as portas á oportunidade dun cambio “político de verdade”, e que iso pasa por apostar no Nacionalismo, “Cremos, manifestou que non é o momento da xestión, é o momento da política con “maiúsculas, a de verdade” e que resulta necesario “mover os marcos” para crear emprego, blindar os servizos públicos como a sanidade, a educación ou a dependencia.
Pontón chamou a todas aquelas que desexen fechar sete anos de gobernos de Núñez Feijóo e abrir unha nova etapa política para o país a que aposten no proxecto “sólido,definido e con alternativas na que todos os galegos e galegas poden confiar” que representa o BNG.