Feixoo e as "Matemáticas de Estado"

O PP comezou xustificando os gobernos con Vox por unha "xeometría variable" e despois por "Matemáticas de Estado", que Feixoo explicaba así: na Comunidade Valenciana "mucha gente ha votado a Vox" (12%), pero en Estremadura só tiveron o 8% e, concluía, non poden esixir a súa presenza no goberno. Lembremos o que dicía Feixoo sobre a posibilidade dese goberno. Primeiro manifestaba: "No tengo intención de pactar con Vox, y no lo haré, es un partido que está contra Galicia". Como bo "marxista", do humorista Groucho Marx, Feixoo segue o seu discurso: "Estes son os meus principios. Se non lle gustan, teño outros", que lle permite dicir hoxe unha cousa, mañá outra e ao día seguinte todo o contrario. A realidade é que Feixoo non só é hoxe o principal valedor de pactos e gobernos de coalición con Vox, senón que asume o seu programa e o discurso da extrema dereita. Feixoo cualificaba en 2019 como "letal" a posibilidade dun pacto do PP con Gonzalo Pérez Xácome. Despois mantiña a Xácome como alcalde, sendo a do PSdeG a candidatura máis votada, porque "garantiza la estabilidad". E en 2023 repite por escrito un pacto con Jácome para que continúe como alcalde, a cambio do voto da Democracia Ourensá para que o PP conserve a Presidencia da Deputación de Ourense. O PP e Feixoo perderon a vergoña hai tempo e culpaban a BNG dese pacto. Unha farsa continuada O discurso inicial de "No gobernaremos con Vox... salvo que necesitemos a Vox para gobernar", converteuse en: gobernaremos con Vox cando nos interese. Isto non é nada novo porque en Andalucía o PP conseguía o goberno co voto do Vox despois de gañar o PSOE as eleccións. En Castela-León, Mañueco lograba a Presidencia tamén co voto de Vox, despois de gañar o PSOE as eleccións. Celebradas as eleccións do pasado 28 de maio, PP e Vox pactaban gobernos de coalición en varias comunidades autónomas e 140 concellos: na Comunidade Valenciana o PSOE foi o máis votado pero un pacto de perdedores daba a Presidencia do goberno ao PP, a Vicepresidencia e a Consellería de Cultura a un toureiro de Vox; en Baleares Vox conseguía a Presidencia do Parlamento balear e presenza nos gobernos insulares de Mallorca e Menorca. Por outra parte, en moitas cidades o PSOE era a lista máis votada, pero o PP, co apoio de Vox, conseguía as Alcaldías de Valladolid, Burgos, Guadalaxara, Toledo, Talavera de la Reina, Elxe etc., e Feixoo seguía dicindo que o PP estaba por deixar gobernar a lista máis votada. En Estremadura a candidata do PP María Guadiola manifestaba: "Tengo principios. Yo no puedo dejar entrar en mi gobierno a aquellos que niegan la violencia machista, a quienes están deshumanizando a los inmigrantes y a quienes tiran a una papelera la bandera LGBTI". E concluía: "Cuando una hace una promesa, es para cumplirla”. Feixoo non debería infravalorar a intelixencia da xente, que está a descubrir que non ten palabra nin principios na súa actuación política E Feixoo declaraba: "El PP ha tenido en Extremadura casi el 39% de los votos y Vox el 8%. Cinco diputados no pueden tener la Presidencia de la Cámara ni miembros en el gobierno". Poucos días despois Guardiola recibe instrucións de Feixoo, cambia o discurso e Vox entra no goberno coa Consellaría de Forestal e Medio Rural. A farsa continúa porque Feixoo enviaba a unha delegación do PP á manifestación de Madrid do Orgullo e difundían fotos entre bandeiras LGBTI. Mentres, un concelleiro de Mérida de Vox manifestaba que esas eran as bandeiras dos pedófilos. Poden fallar esas "Matemáticas de Estado" porque Vox xa adiantou que Feixoo non presidirá un goberno se non ten 176 votos, que esixirán a presenza nese goberno e que serán eles quen designen o seu vicepresidente. Feixoo non debería infravalorar a intelixencia da xente, que está a descubrir que non ten palabra nin principios na súa actuación política e que o seu único obxectivo é conseguir o máximo poder posíbel. Galiza con voz propia e máis forza A maioría dos medios de comunicación sitúan as eleccións xerais do 23 de xullo como unha confrontación entre dous bloques, PP-Vox e PSOE-Sumar. Se trunfa este deseño de campaña, Galiza desaparecería. É o momento de Galiza para acadar un grupo galego forte no Congreso, como xa teñen Euskal Herria e Cataluña, que condicione as decisións do Estado e favoreza os intereses de Galiza. Cando o voto do BNG foi determinante no Congreso para decidir o goberno e os Orzamentos do Estado, Galiza conseguía os maiores investimentos da súa historia. Por outra parte, a negociación do BNG do pacto de investidura de Pedro Sánchez permitiu que Galiza conseguise algúns compromisos como o desconto nas peaxes da AP-9, gratuidade da AP-P9 no tramo Vigo-Redondela; inicio da rexeneración da ría do Burgo, conexión ferroviaria até o Porto Exterior da Coruña; electrificación e modernización da liña ferroviaria Lugo-Ourense e continuidade da actividade industrial de Alcoa.