A enquisa 'flash' do CIS para as eleccións estatais do vindeiro 23 de xullo sitúa o PSOE 1,4 puntos por diante do PP en estimación de voto. En concreto, vaticina un apoio de 32,2% para os socialistas fronte ao 30,8% que concede aos 'populares'. En terceira posición figura Sumar, con 14,9%, e a cuarta praza é para Vox, para quen se calcula un apoio de 11,8%. O BNG medraría considerabelmente até 0,9% dos sufraxios a nivel estatal.
Este 'flash' baséase nun total de 8.798 entrevistas telefónicas levadas a cabo en 1.950 municipios de 50 provincias do Estado español entre o 10 e 12 de xullo e ten unha marxe de erro, segundo o propio organismo, que rolda 1,1%. O traballo de campo iniciouse horas antes do 'cara a cara' que protagonizaron o pasado 10 de xullo o presidente do Goberno español, Pedro Sánchez, e o líder do PP, Alberto Núñez Feixoo. Trátase do único dos catro estudos do CIS con estimación de voto realizados tras a convocatoria electoral que se fixo cando xa arrincara a campaña.
En chave galega, o CIS outorga ao BNG un 0,9% de estimación de voto —e até 0,8% en intención directa—, o que se traduce nun incremento dunha décima a respecto do último barómetro e case o dobre dos sufraxios recollidos nas estatais de decembro de 2019, cando a formación nacionalista lograra arredor de 0,5% de apoios. Isto permitiríalle, con base nas últimas sondaxes, tanto do CIS como de organismos privados —que apuntan na mesma liña—, lograr entre dous e tres escanos
Nas últimas tres semanas o organismo que preside o sociólogo socialista José Félix Tezanos difundiu tres sondaxes e só nunha deu a vitoria ao PP, partido que aparece como gañador das eleccións no resto de sondaxes realizadas por institutos privados nas últimas datas. O PP unicamente quedou por diante do PSOE, malia que cunha vantaxe de tan só dúas décimas, na macroenquisa preelectoral do CIS, que se fixo entre o 8 e o 27 de xuño e publicouse o 5 de xullo. Trátase do estudo coa mostra máis ampla dos levados a cabo polo centro sociolóxico con vistas ao 23-X: máis de 29.000 entrevistas.
A semana pasada, concretamente o día 13, o CIS publicou o seu barómetro de xullo, baseado en 4.166 entrevistas, realizadas entre o 30 de xuño e o 5 de xullo. Esa enquisa situaba o PSOE en primeira posición, cunha vantaxe de 1,4 puntos sobre o PP. O 'flash' publicado esta segunda feira baséase en 8.798 testemuños e volve situar como gañadores os socialistas, coa mesma vantaxe que o barómetro publicado a semana pasada.
O PSOE tamén gaña en voto directo no 'flash'. Nesta ocasión, para calcular este dato o CIS tivo en conta, alén das respostas xerais, aquelas de as persoas que afirmaron votar xa por correo. Así, a sondaxe outorga 26,5% de voto xa decidido aos socialistas, un 24,9% para os 'populares', un 2,3% asegura que se vai a abster, un 12,1% aínda non sabe que fará e un 5,6% prefire non contestar.
Con todas as respostas do cuestionario e a fórmula do CIS, o PSOE mellora a súa estimación tanto respecto a a macroencuensta como ao barómetro de xullo. En concreto, o CIS calcúlalle un 32,2%, un punto máis que na macroencuesta e 1,2 puntos máis que no último barómetro. É a súa mellor porcentaxe desde o 32,7% que lle outorgou o CIS o pasado mes de marzo, e supoñen 4,2 puntos máis dos que logrou nas estatais de decembro de 2019.
Pola súa parte, o PP medra 1,2 se se compara o seu dato co barómetro de xullo, mais perde seis décimas se se mira o da macroencuesta, na que cultivou un 31,4%, a súa mellor porcentaxe da lexislatura. Agora o CIS atribúelle o seu segundo mellor dato deste período, un 30,8%, case 10 puntos máis que o 20,82% que logrou nas urnas cando Pablo Casado era o seu candidato á Moncloa.
Como terceira forza figura a plataforma da vicepresidenta Yolanda Díaz, que perde fol respecto a as dúas enquisas anteriores e queda cun 14,9% —son seis décimas menos que no barómetro e 1,5 puntos menos que a macroenquisa—. En calquera caso, segue algo máis de dous puntos por riba do 12,84% dos votos que conseguiu Unidas Podemos hai catro anos con Pablo Iglesias á fronte.
E en cuarta posición repite a extrema dereita de Vox, cun 11,8%, mellorando un décima respecto ao barómetro e 1,2 respecto a a macroenquisa preelectoral. A formación de Santiago Abascal aínda dista do 15,09% que alcanzou nos anteriores eleccións e que a situou como terceiro partido do Congreso, con 52 escanos.
Por outra parte, o CIS estima un 2,1% de apoio para ERC, que mellora levemente respecto a as dúas sondaxes anteriores, un 1,4% para Junts e un empate a 1,1% entre o PNV e EH Bildu. A CUP ficaría cun 0,6%.
