Ence, Coren, Finsa, Frigolouro, Hijos de Rivera (Estrella Galicia), Bimba & Lola ou Dalpfhi Metal son algunhas das empresas na Galiza que teñen máis de 50 traballadores e traballadoras e que carecen de Plan de Igualdade, "incumprindo así o Real decreto lei do ano 2019, de medidas urxentes para garantir a igualdade de trato e oportunidade entre homes e mulleres no emprego". Así o denunciou onte no Parlamento galego a deputada nacionalista Carmela González, que lamentou que mesmo institucións como o Parlamento galego ou a Xunta da Galiza carezan tamén deste plan.
A través dunha pregunta parlamentaria formulada ao Goberno galego por González sobre a implantación do plan de igualdade en empresas con máis de cincuenta persoas empregadas, a directora xeral de Relacións Laborais, Elena Montero "confirmou ao BNG que ao redor de 75% das empresas carecen deste plan".
Para a deputada nacionalista resulta “chamativo” que na actualidade empresas desa categoría “obrigadas” a contar co Plan de Igualdade incumpran o Real decreto e mostrou a súa confianza en que as mesas de traballo que continúan abertas para elaborar os plans, "pronto poidan finalizalo".
Liña vermella
Carmela González insistiu que as grandes empresas contan con persoal asesor e equipos legais que poden facilitar a elaboración e posta en marcha do Plan de Igualdade. "Sabemos", advertiu que “tardaremos un pouco en implantalos nas empresas pequenas por dificultades intrínsecas” mais urxe marcar “unha liña vermella” para obrigar as empresas con capacidade.
A deputada do BNG transmitiu á directora xeral de Relacións laborais a benvida de todas as medidas que enunciou destinadas a conseguir unha verdadeira igualdade entre homes e mulleres pero cominou a membro do goberno a seguir traballando para acadar a posta en marcha do Plan de Igualdade nas empresas, e naquelas que non reaccionen, sentenciou, “deberán recibir un aviso e se non responden ao requirimento, unha sanción”, concluíu.