Sumar non encheu o salón pequeno do Palexco no estreo de Yolanda Díaz na precampaña galega pero a formación amósase convencida do seu papel central no cambio na Galiza. Neste sentido, o voceiro da formación, Paulo Carlos López sinalou que “imos ser quen determine o próximo Goberno da Xunta”.
López asegurou que que “o detonante político do cambio na Xunta é Sumar”, a quen presentou como a “casa común de todas as persoas progresistas”. Nesta liña, defendeu que “esta é a casa das persoas que queremos dignidade laboral para as enfermeiras en loita, dos bombeiros en folga, das persoas en situación de precariedade".
Díaz insistiu na mesma dirección de López que “Sumar Galiza é a forza decisiva para o cambio. A este respecto, argumentou que “só co BNG e o PSdeG non hai cambio na Xunta da Galiza”.
A vicepresidente do Goberno do Estado explicou en relación co BNG e o PSdeG que “temos diferenzas, témolas, pero temos que transmitir esperanza e capacidade de traballo conxunto para chegar á Xunta igual que para o Goberno de España”.
“É posíbel cambiar as cousas”
A líder de Sumar amosouse convencida de que “é posíbel cambiar as cousas”. Nesta liña, chamou a mobilización dos seus para impulsar unha mudanza de rumbo á fronte do Goberno galego.
Díaz lembrou en relacións cos comicios estatais que “ninguén cría que podiamos gañar e dicíannos que estaba feito, que Feixoo ía gañar e o seu vicepresidente ía ser Abascal" e asegurou que os votos de Sumar fixeron “posíbel hoxe que Abascal non sexa vicepresidente".
A vicepresidente do Goberno do Estado reclamou “crer en nós”, porque “ podemos gañar na Galiza". Nesta dirección, recordou que nas eleccións estatais o voto á esquerda do PP superou os alcanzados por Núñez Feixoo en 2020.
