A constitución das corporacións locais de Noia, Mazaricos, Outes, Lousame, Porto do Son, Muros, Ribeira, Boiro e Pobra do Caramiñal terá que agardar até o vindeiro 7 de xullo e non será, como na meirande parte dos concellos do país, este sábado, como estaba previsto. Así vén de decretalo a Xunta Electoral de Zona de Noia a través dunha resolución, asinada ás 15 horas desta quinta feira, á que tivo acceso Nós Diario.
A decisión vén motivada pola admisión dun recurso interposto polo PSdeG-PSOE, que solicitaba o reconto dos votos nulos en todas as mesas electorais do partido xudicial de Noia, pois estaba en xogo o segundo deputado provincial que outorga e que recaeu no BNG por unha diferenza de só 11 votos —o primeiro foi para o PP—. O recurso chegou esta mesma mañá aos xulgados de Noia após ser rexeitado pola Xunta Electoral Central, o que imposibilitou finalmente a convocatoria das sesións constitutivas para este sábado por unha cuestión de prazos, pois agora os socialistas teñen a posibilidade de presentar outro recurso contencioso-administrativo —malia que xa desbotaron esta opción—.
Esta decisión colleu por sorpresa os nove concellos afectados, pois xa estaban xa estaban chamados a tomar posesión e escoller as novas alcaldías os edís electos o pasado 28 de maio, nunhas sesións plenarias xa convocadas para o sábado.
Precisamente esta quinta feira o BNG, o PSdeG e o Partido Barbanza Independente selaban un pacto de goberno que sitúa á fronte o nacionalista Luís Pérez Barral, sumando así un total de 11 escanos que outorgan a maioría fronte aos 10 do Partido Popular, cuxo candidato, o aínda alcalde Manuel Ruiz Rivas, deixará o consistorio para concorrer como candidato o próximo 23 de xullo.
Corcubión, no ar por un só voto
Tamén no concello de Corcubión deberán agardar até o 7 de xullo para constituír a nova corporación local, pois a Xunta electoral de zona decretou tamén esta quinta feira o adiamento da sesión inaugural do novo período por estar aínda pendente de aceptación o recurso presentado polo Partido Autónomo de Corcubión (Pacor) demandando a impugnación dun único voto.
Ese sufraxio sería decisivo para que o Pacor, que alega que a papeleta, a favor do PP, estaría pintada con rotulador e, en consecuencia, sería nula. Ao abeiro da Lei d'Hondt, a perda dese voto outorgaría á formación demandante un escano que lle permitiría entrar no consistorio en detrimento dos populares, que quedarían cun único edil.
En Corcubión venceu o BNG con catro escanos, seguido de PSOE e PP, con dous —un deles o que está en disputa—, e Candidatura de Xestión Municipal, con un. Sen acta, con 92 sufraxios, ficou o Pacor.
