As persoas rexistradas de Podemos veñen de ratificar a ex ministra de Igualdade Irene Montero como candidata ás eleccións europeas, unha cita electoral chave na que terá a misión de relanzar o partido e na que se medirá cara a cara a Sumar, logo da ruptura no Congreso que levou as moradas ao Grupo Mixto. Tamén a nivel autonómico as bases de Podemos apoiaron os candidatos e candidatas afíns á dirección en oito territorios, polo que a dirección estatal garante a estabilidade nestes lugares.
Así o avanzou a líder de Podemos, Ione Belarra, ao comezo do Consello Cidadán estatal do partido para detallar que, no caso das primarias de cara aos comicios europeos, participaron 36.054 persoas. Desa cifra, máis de 30.581 apoiaron a ex ministra de Igualdade, o que representa 85% do total de votos emitidos nunhas primarias onde non tiña rivais de relevancia.
A cifra de participación é inferior á última consulta da formación respecto ao apoio á investidura, onde votaron 55.000 persoas rexistradas, pero superior ao proceso para referendar o último documento estratéxico do partido o pasado mes de novembro, que mobilizou 31.000 persoas. Belarra debullou que Montero asume o reto de "poñer en pé" ao proxecto político que representa á "esquerda inconformista" e que se van a "deixar a pel" para levar de novo a voz de Podemos en Europa.
A secretaria de Organización da formación morada reivindicou que as primarias son o "principal patrimonio político" do partido e que debe protexerse: "En Podemos os dirixentes mandamos obedecendo, e quen decide se merecemos a confianza dos cargos que ostentamos é a militancia", resolveu.
Coordinadores autonómicos
Respecto á elección de novos e novas coordinadoras rexionais, cumpríronse os prognósticos coa vitoria de diversos dirixentes afíns á Executiva. Desta forma, Isa Serra será a líder en Madrid; María Teresa Pérez, no País Valencià; Lucía Moñiz, en Balears; a deputada Noemí Santana, en Canarias, e tanto Conchi Abellán como Javier Sánchez Serna repiten á fronte do partido en Catalunya e Murcia, respectivamente. Tamén foi proclamada coordinadora autonómica de Aragón a ex portavoz no Parlamento rexional Marta de Santos, e en Asturias, un territorio sumido en crise interna desde hai tempo, o 'oficialista' Diego Ruiz de la Peña vence ao sector crítico.
Os novos coordinadores terán a misión de relanzar un partido que atravesa un momento delicado e adoece de debilidade territorial, dado que é forza extraparlamentaria en Galiza, Madrid, País Valencià ou Canarias, unido ao forte retroceso de representación en Balears, Aragón e Asturias tras as últimas eleccións autonómicas.
Ese pau electoral supuxo tamén a perda de todos os seus gobernos autonómicos nos que tiña presenza, agás Nafarroa, onde ten a súa única conselleira. Mentres, a nivel estatal, a formación trata de facer valer as súas catro deputadas no Congreso e gañar relevancia parlamentaria, dado que xa non forma parte do Executivo de coalición.
As europeas, cita chave
No que atinxe aos comicios europeos, Podemos fía o seu futuro electoral á ex ministra de Igualdade dado que esta cita é a aposta do partido para volver fortalecerse fronte á irrupción de Sumar. Xunto a esa pugna electoral o partido sufriu un goteo de baixas e dimisións durante os últimos meses, como é o caso recente da ex secretaria de Organización, Lilith Verstrynge, que renunciou aos seus cargos no partido, así como outros exdirigentes como Alejandra Jacinto, Jaume Asens, Antón Gómez Reino ou Jesús Santos.
Os morados móstranse optimistas de que as europeas, que tamén teñen un valor simbólico ao coincidir co décimo aniversario da súa irrupción, sirvan para ter representación na Eurocámara.
