Nós Diario fixo público este sábado o barómetro completo elaborado por EM-Analytics que outorga 39 escanos ao PP, tres menos dos que ten actualmente. O BNG obetría 22 actas, tres máis das actuais, O PSOE retrocedería nun escano obtendo 13 e a Democracia Ourensá (DO) de Gonzalo Pérez Xácome entraría no Parlamento cunha acta.
Así, os principais partidos que concorren ás eleccións do 18 de febreiro (18-F) reaccionaron a esta enquisa preguntados por Nós Diario:
PP
Ante a pregunta deste xornal sobre o barómetro, o equipo de campaña do Partido Popular decidiu “non facer valoración” ningunha.
BNG
Pola contra, o principal partido da oposición, o BNG, asegurou a este xornal que “vemos a enquisa con atención e cautela porque sabemos que cada vez as campañas son máis determinantes”. A formación nacionalista analiza ademais que “a tendencia está clara, e é un PP á baixa e un BNG á alza” polo que ven “posibilidades moi reais de encabezar o goberno do cambio na Galiza”.
PSdeG
Preguntado por este xornal, desde o PSdeG indican que "nunca entran a valorar enquisas".
Sumar
Pola súa parte, desde Sumar Galicia aseguran a Nós Diario que “todas as enquisas, agás esta, din que Sumar Galicia xa está dentro do Parlamento”. En opinión do movemento Sumar na Galiza, “desde logo estamos ante a excepción que confirma a regra. Sumar Galicia será o detonante do cambio político xa que ada deputado de Sumar quítalle un deputado ao PP”.
DO
Desde DO, preguntados por este xornal, aseguran que “un deputado é o noso chan, contamos con dous ou tres”. Ademais, a formación ourensá indica que “buscamos ser chave na formación do próximo goberno da Xunta”. Sobre a posíbel maioría absoluta do PP, desde DO cren que “non o vai conseguir porque discrimina zonas do territorio como por exemplo Ourense”.
Podemos
Finalmente, desde Podemos inciden a respecto do barómetro de Nós Diario que “calquera enquisa que outorgue maioría absoluta ao PP é unha mala noticia, queda moita campaña por diante para dar un cambio”. Aliás, aseguran que “Podemos está afeito a que se lle minusvalorice nas enquisas cunha finalidade de desanimar o noso electorado. Sen Podemos no parlamento volvemos á vella política de antes do 15-M, unha política de despachos e lugares escuros. O 18 de febreiro decidamos o noso voto polo que pensamos”.
