Amnistía e autodeterminación

Amnistía e autodeterminación son as claves que van decidir a investidura do próximo presidente do Goberno. O PP dá por perdida a investidura de Feixoo, Aznar marca a política do partido na inauguración do cursos da fundación FAES co apoio do sector máis duro (Isabel Ayuso, Cayetana Álvarez de Toledo) e Feixoo execútaa, convocando unha manifestación-acto-mitin en Madrid o 24 de setembro, dous días antes da sesión de investidura e evitando a foto con Abascal. Aznar chamaba a unha rebelión nacional que, de momento, non é un 'Alzamiento Nacional', como en 1936. O acto estará centrado en lembrar ETA, contra a amnistía e que "España se rompe". Vexamos algunhas referencias históricas da actuación do PSOE e do PP sobre amnistías e indultos. Aznar, o "xeneroso" Miguel Ángel Blanco era asasinado por ETA o 13 de xullo de 1997. Sete meses despois, o 3 de marzo de 1998, o presidente Aznar declaraba: "Si los terroristas deciden dejar las armas sabré ser generoso". "Aznar abre el diálogo con ETA", titulaba El Mundo do 4 de novembro de 1998. ETA declaraba unha tregua unilateral o 16 de setembro de 1998 e oito meses despois, 19 de maio de 1999, Aznar enviaba a Suíza unha delegación de catro persoas a negociar con ETA, entre elas Pedro Arriola asesor persoal de Aznar. Como resultado do pacto do Majestic para a investidura de Aznar co apoio de CiU, o Consello de Ministros que presidía Aznar aprobaba o indulto para 15 militantes de Terra Lliure o 28 de xuño de 1996, que o PP consideraba como organización terrorista. Para facilitar esa negociación con ETA o Goberno do PP ordenaba o traslado de máis de 120 presas e presos de ETA a cárceres de Euskadi entre setembro de 1998 e setembro de 1999. E en maio de 1999 o Goberno do PP anunciaba que 304 persoas vinculadas a ETA poderían regresar a España, entre elas aquelas con delitos prescritos, incluídos algúns con delitos de sangue. Esta era a "xenerosidade" prometida por Aznar: 311 excarceracións de presas e presos de ETA, 64 correspondían a terroristas condenados por asasinatos a penas superiores a vinte anos. Aznar tiña tanto interese en falar con ETA, que non era definida como organización terrorista: "He autorizado contactos con el Movimiento de Liberación Vasco" Esas negociacións con ETA e a política penitenciaria para favorecer os presos eran tamén defendidas por dirixentes do PP no Congreso en 1999, como o deputado Ignacio Gil Lázaro, hoxe dirixente de Vox: "El presidente de Vox en Valencia ensalzaba a Aznar por autorizar contactos con ETA y acercar presos". "Por la paz el presidente ha impulsado un conjunto muy importante de iniciativas", manifestaba Gil Lázaro (Infolibre, 14-6-2023). Non avanzaban as negociacións e Aznar declaraba o 10 de setembro de 1999: "Si no se producen los contactos es porque ETA no quiere. No hay ninguna otra razón". Tiña tanto interese en falar con ETA, que non era definida como organización terrorista: "He autorizado contactos con el Movimiento de Liberación Vasco". "La independencia vasca es legítima si no se impone por la fuerza" (declaracións a Radio Nacional o16-5-2001). Despois do referendo de autodeterminación de 1 de outubro de 2017, Raxoi propuña ao presidente Puigdemont suspender a aplicación do artigo 155 da Constitución se non había declaración unilateral de independencia, que era recollido así na portada de ABC de 19 de outubro de 2017: "Rajoy ofrece 'Amnistía' a cambio de elecciones legales". Indultos O xeneral Alfonso Armada, participante no intento de golpe de Estado de 23 de febreiro de 1981, foi condenado a 30 anos de cárcere por sentenza do 28 de abril de 1983. Armada non "cantou" no xuízo, mantivo o pacto de silencio co rei Juan Carlos e conseguía a liberdade definitiva o 24 de decembro de 1988, grazas a un indulto do Goberno de Felipe González por razóns de saúde e acatar a Constitución. Retirouse ao seu pazo en Galiza, cultivou camelias e, a pesar da súa delicada saúde, aínda viviu 25 anos máis. José Barrionuevo, ministro de Interior, e Rafael Vera, secretario de Estado do Goberno de Felipe González, considerados os "cerebros" dos GAL, foron condenados polo secuestro de Segundo Marey, reivindicado polos GAL, e indultados polo Goberno de Aznar. Saíron de prisión en decembro de 1998. Houbo amnistías fiscais como a do ministro Cristóbal Montoro en 2012, que permitiu regularizar rendas non declaradas nos exercicios fiscais de 2008, 2009 e 2010, que beneficiaron a case 31.500 persoas, entre elas políticos e empresarios, como Rodrigo Rato e Luis Bárcenas. Afloraron 40.000 millóns de euros que estaban ocultos e o Estado ingresou 1.200 millóns, a metade do previsto. O Tribunal Supremo non se manifestou en contra dos indultos a Armada, Barrionuevo e Vera, pero agora o seu presidente considera que a amnistía a máis de 4.000 persoas afectadas polo Procés non sería constitucional. A farsa continúa!