Un total de 29.300 galegos e galegas residentes no estranxeiro votaron nestas eleccións nacionais de 2024, o que supón 6,15% das 476.514 que forman parte do Censo Electoral dos Residentes Ausentes (CERA).
Así o confirmou o director xeral de Emerxencias, Santiago Villanueva, en rolda de prensa este domingo no Centro de Datos da Xunta instalado en San Caetano.
Os resultados deste voto, que por primeira vez despois de tres comicios galegos non foi 'rogado', darase a coñecer o 26 de febreiro. No 2020 votaran 5.404 persoas (1,17%); en 2016, 10.777 (2,41%); e en 2012, 12.954 (3,26%). Mentres, en 2009 depositaran o seu voto no estranxeiro 101.708 electores, 30,2% do total.
Polo momento descoñécese o voto do estranxeiro debullado por circunscripcións. En todo caso, a da Coruña é a que rexistra un maior número de electores CERA, con 164.842; seguida de Pontevedra, con 138.182; Ourense, con 103.832; e Lugo, con 69.658.
En canto ao ‘Top-5’ de países, segundo o número de potenciais electoras que residen no estranxeiro, a Arxentina segue á cabeza con moita diferenza, xa que computa 166.289. Séguenlle Cuba e Brasil, onde se superan os 45.000. Mentres, Uruguai computa 37.165; e Suíza, o primeiro país alleo ao continente americano no ránking, 34.114.
