'Pelé, o rei do fútbol na Galiza' abre o caderno 'Xogar' desta semana

Billarda, vela, baloncesto, balonmán ou roller derby teñen un oco esta semana no suplemento deportivo de Nós Diario, que abre unha reportaxe histórica sobre a visita galega de Edson Arantes do Nascimento en 1959, quen botou un raio de luz brasileira sobre as vidas dunha poboación que tiña no fútbol unha vía de escape

Edson Arantes do Nascimento, 'Pelé' (centro), sobre o céspede de Riazor con Garrincha, Jair, Milton Santos, Zagallo, Pepe e Didí sobre o céspede de Riazor.
photo_camera Edson Arantes do Nascimento, 'Pelé' (centro), con Garrincha, Jair, Milton Santos, Zagallo, Pepe e Didí sobre o céspede de Riazor.

O de Pelé é un deses nomes que non necesita ir acompañado dunha presentación. Considerado -con permiso de Maradona- o mellor xogador de todos os tempos, na súa ampla carreira gañou tres copas do mundo e anotou 1281 tantos en 1363 partidos, unha marca estratosférica á que ninguén conseguiu acercarse nin remotamente.

Antes de lograr a maioría dos recoñecementos que adornan o seu palmarés, mais co Mundial de Suecia xa no peto, un Pelé de 19 anos chegou á cidade da Coruña para disputar o Trofeo Teresa Herrera de 1959.

Gañou o seu Santos por 4-1 ao Botafogo de Garrincha, el marcou un gol e deixou unha pegada indelébel entre todas as persoas que tiveron a sorte de asistir ao encontro, até o punto de que o lendario crítico deportivo coruñés José Luís Bugallal, Marathón, -que nunca antes se desfixera en eloxios cara a un futbolista e nunca máis volvería facelo- escribiu: "Pelé é un xenio fenomenal, fóra de serie, un novo mago do fútbol que domina a pelota, xoguetea con ela, aloumíñaa, dispara ao seu antollo...".

O impacto mutuo entre Pelé e a cidade da Coruña

A devoción de Galiza por Pelé foi alén do seu fútbol. O brasileiro caeu en graza polo seu humilde comportamento dentro e fóra do campo e polo seu eterno sorriso. 

Lamentabelmente, esta foi a derradeira vez que a afección galega tivo a sorte de ver sobre un terreo de xogo do país o Rei do fútbol, aínda que o impacto que creou a nosa terra en Pelé tamén foi mutuo.

(Podes ler o artigo íntegro de 'Pelé, o rei do fútbol na Galiza'  no suplemento Xogar, no teu Nós Diario de hoxe (e de todas as terzas feiras), á venda no teu quiosque, libraría, tenda, gasolineira ou na nosa loja)

Neste número, ademais, Omar Bello escribe sobre a billarda no artigo 'Un deporte para un país'; Ismael R. Saborido e Óscar Losada deixan as súas opinións nas seccións 'Meta voante' e 'Pé a terra', e Sergio García, adestrador do Basquet Coruña, protagoniza o 'selfie' desta semana.

Suplementos diarios de carácter temático

Coñecer’, ‘Aprender’, ‘Xogar’, ‘Gozar’ e ‘Producir’ publicaranse de terzas feiras a sábados co diario para ampliar a información relativa a patrimonio, historia, arte, ciencia, educación ambiental, ensino, actividade física, gastronomía, enoloxía, viaxes, sectores produtivos e iniciativas empresariais, entre outros. Unha aposta de Nós Diario no marco da celebración dos seus cen primeiros números en papel.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Máis en Nós Diario
comentarios