sábado 16/10/21

Vilalba rastrexará nas súas rúas nomes e símbolos franquistas para retiralos

En cumprimento da Lei de Memoria Histórica.

Elba Veleiro, alcaldesa de Vilalba
Elba Veleiro, alcaldesa de Vilalba

O Concello de Vilalba impulsará un rastrexo para detectar nomes de rúas e elementos franquistas, tanto na vila como nas parroquias, que poidan incumprir a Lei de Memoria Histórica.

Así o anunciou a alcaldesa, Elba Veleiro, que engadiu que para iso designarase unha "mesa mixta" conformada por expertos e técnicos "coñecedores da materia". "Vaise a facer un estudo da realidade en canto ao nome das rúas como outro tipo de simboloxía franquista", puntualizou.

Posteriormente, comprobaranse as conclusións que saque esa "mesa mixta" e actuarase "en consecuencia". "En función dos resultados dese estudo aplicaranse as medidas que correspondan", especificou, que pasarían pola eliminación dos devanditos nomes do mapa de rúas do concello.

Designarase unha "mesa mixta" conformada por expertos e técnicos "coñecedores da materia". "Vaise a facer un estudo da realidade en canto ao nome das rúas como outro tipo de simboloxía franquista"

Sobre o nome de rúas e outros elementos franquistas, a alcaldesa de Vilalba asegurou que se mantén "algunha máis" das que o Goberno local coñecía inicialmente.

"Xa se fixo algunha proposta anteriormente, noutras lexislaturas e por iso imos proceder con ese estudo non só no centro urbano senón tamén nas parroquias", aseverou.

De momento descoñece cantas rúas estarían afectadas, por iso é polo que xustifique que se vaian "sentar con esa xente máis coñecedora da materia, tamén consultando a cidadanía e a persoas maiores que nos poidan achegar máis información da historia de Vilalba".

comentarios