A Xustiza española lánzase contra a amnistía ante o inminente acordo entre PSOE e Junts

O maxistrado da Audiencia Nacional española Manuel García-Castellón imputou hoxe por suposto delito de terrorismo o ex presidente da Generalitat, Carles Puigdemont, na investigación que instrúe contra Tsunami Democràtic, unha plataforma que liderou as protestas en 2019 en Catalunya polas sentenzas de prisión contra os ex membros do Executivo catalán que non marcharon ao exilio, e que incluíu o bloqueo do aeroporto Josep Tarradellas Barcelona-El Prat. Esta decisión chega cando a prensa estatal considera inminente un acordo de investidura entre Junts, a formación de Puigdemont, e o PSOE, para apoiar a reelección no Congreso de Pedro Sánchez (PSOE) como presidente español a cambio de, entre outros, unha lei de amnistía que beneficie as persoas independentistas represaliadas polo Estado no contexto do proceso de autodeterminación catalán. No caso do ex mandatario, a imputación non se pode formalizar de forma automática ao ser deputado no Parlamento da Unión Europea, polo que antes o xuíz ten que enviar unha petición ao lexislativo. Tamén foron incluídas na causa a secretaria xeral de Esquerra Republicana de Catalunya (ERC), Marta Rovira, tamén exiliada, e unha decena de membros das forzas políticas catalás. O maxistrado atribúe a Puigdemont o “liderado” da plataforma, logo de que o informe da Garda Civil no que basea a acusación outorgara ese papel a Rovira, e chama a declarar o líder de EH Bildu, Arnaldo Otegi, por presuntamente asistir a un encontro no que “puido terse planificado a actuación de Tsunami”. O documento das forzas de seguridade españolas incide en que a plataforma era unha ferramenta de “desestabilización" para “comprometer a estabilidade económica, social, empresarial e institucional de España”. Para tratar de evitar que as persoas imputadas se beneficien da amnistía, o portal Vilaweb apunta que, ao incluírse na norma os casos con acusacións de terrorismo sen vítimas mortais, García-Castellón afirmou que “no marco desta acción morreu unha persoa”, en alusión ao falecemento dun home de 65 anos por mor dun infarto despois de camiñar tres quilómetros polo bloqueo do aeroporto, e houbo ducias de persoas feridas. A Fiscalía anunciou que recorrerá a imputación de Rovira e Puigdemont, criticada por ERC e Junts. O nome do maxistrado apareceu vinculado ao Partido Popular (PP) en múltiples ocasións, chegando a ser reclamada a súa volta á Audiencia Nacional para frear os casos de corrupción contra a formación, nunha conversa entre Eduardo Zaplana -ex presidente valenciano e ex ministro dos conservadores- e Ignacio González -ex presidente da Comunidade de Madrid polo PP- interceptada pola Garda Civil. Porén, esta non é a única iniciativa xudicial para interferir nunha lei de amnistía cuxo proxecto non foi sequera rexistrado no Congreso. O 13 de novembro o Xulgado de Primeira Instancia 104 de Madrid estudará unha petición dunha cidadá española para paralizar a tramitación parlamentaria da norma. A decisión final recaerá no xuíz José Ramón Manzanares Codesal, que foi indultado no mandato do conservador José María Aznar logo de ser apartado do seu cargo por unha condena por prevaricación xudicial. No que atinxe ao Consello Xeral do Poder Xudicial, que leva case cinco anos co mandato caducado pola negativa do PP a negociar a súa renovación, o que lle permite manter unha maioría de xuízas e xuíces conservadores no órgano, desenvolve hoxe unha xuntanza solicitada por oito membros propostos pola mesma organización no seu día, na que buscaban condenar a lei de amnistía, que para a conservadora Asociación Profesional da Maxistratura é o “principio da fin da democracia”. A reiteración das mesmas posicións do PP e da ultraespañolista Vox foi criticada pola progresista Xuízas e Xuíces para a Democracia, que cualifica o sector conservador de “servil” coa oposición política no Estado, o que “enlama” o sistema xudicial. Finalmente, aprobou unha declaración institucional grazas a nove votos conservadores na que asegura que a amnistía é case que unha "abolición do Estado de dereito", cuestionando que se produza para que Sánchez poida "manterse no Goberno". Pola súa parte, o presidente do PP, Alberto Núñez Feixoo, anunciou que organizarán novas protestas contra a amnistía o vindeiro domingo ás 12 da mañá en todo o Estado, aseverando que conforma o “maior ataque ao Estado de dereito, á igualdade dos españois e ás institucións”. Golpe de Estado Asinadas polo colectivo de extrema dereita Acción Civil e datadas o 1 de novembro, foron entregadas hoxe cartas en varios cuarteis das Forzas Armadas estatais nas que se reclama aos militares un golpe de Estado, reiterando que “o pobo volve requirir unha resposta do Exército español, da Garda Civil e da Policía Nacional” pola “extrema gravidade da situación”, reporta o xornal dixital El Nacional. Asemade, apelando a cuestións como o avance do “separatismo”, insiste en demandar que actúen “segundo os ditames da vosa consciencia” para “saír deste réxime de partidos convertido en tiranía e opresión”. A amnistía, pendente de "cuestións técnicas" Fontes da negociación entre o PSOE e Junts para fechar un Proxecto de lei de amnistía, o último punto que falta para anunciar o acordo, trasladaron hoxe a medios estatais que só restan “cuestións técnicas”, o que está a dilatar un proceso que está nas mans dos equipos legais das partes, e que, subliña o negociador de Sumar, Jaume Asens, procura que “os xuíces non teñan a tentación de suplantar o lexislador”. Nese sentido, recalcan que o PSOE cedeu á exixencia de Junts de que sexan incluídos na amnistía os casos de lawfare, o uso da Xustiza para deslexitimar un rival político. Sobre este punto, que permitiría acollerse á norma a Laura Borràs, presidenta de Junts condenada por fraccionar contratos dunha entidade pública, a voceira de ERC, Raquel Sans, rexeitou que a amnistía comprenda condenas de corrupción “aínda que detrás haxa seguramente un trato inxusto polo feito de ser unha persoa independentista”, e asegurou que a formación “revisará” a proposta de lei que pacten PSOE e Junts antes de darlle luz verde. Negociación co PNV O presidente de Euskadi, Iñigo Urkullu (Partido Nacionalista Vasco), salientou que o Estatuto vasco está “pendente de cumprir”, e lembrou que o PSOE precisa os seus votos incluso co pacto con Junts.