Junts terá a última palabra sobre a Mesa do Congreso tras pedir "feitos" ao PSOE

Hoxe constitúese o Congreso e o Senado no Estado español resultantes das eleccións lexislativas estatais do pasado 23 de xuño. Ás 10 horas da mañá comezará o proceso en ambas as Cámaras, e mentres no Senado a maioría do Partido Popular (PP) permitiralle facerse co control da Mesa, no Congreso todo está nas mans de Junts, que decidirá dúas horas antes do comezo da sesión cal será o sentido do seu voto. A decisión, segundo trasladou a medios estatais o PSOE e forzas que permitiron a anterior investidura do seu candidato e actual mandatario, Pedro Sánchez, levaría a uns novos comicios no caso de que Francina Armengol, ex presidenta das Illes Balears pola formación, non sexa elixida como presidenta do Congreso. Carles Puigdemont, ex presidente de Catalunya e ex líder de Junts, incidiu onte en que precisan “feitos comprobábeis” antes de involucrar os votos da forza soberanista en pactos para a Mesa ou “en acordos de máis calado, como sería o da investidura”. Asemade, fixo fincapé en que “non podemos avanzar nacionalmente a base de promesas formuladas por quen sempre as incumpre”, apelando á falta de “confianza nos partidos políticos españois”, algo que “non desaparecerá por un acordo e que un desacordo non fará máis profunda”. En paralelo, puxo o foco en que as súas demandas “non variaron”. Nunhas negociacións nas que a palabra máis repetida por todas as forzas implicadas foi “discreción”, a resolución da situación tamén terá repercusións no que atinxe á política catalá. As demandas Malia que o PSOE buscaba que as negociacións arredor da Mesa do Congreso decorresen só sobre cuestións referentes ao órgano, adiando desta maneira as conversas de cariz político, Junts reclama garantías de que se activará un procedemento que resulte na amnistía das persoas axuizadas e perseguidas pola organización dun referendo de independencia en Catalunya no ano 2017. Pola súa parte, ERC demanda que non se vete o debate sobre unha norma que permita a amnistía, unha comisión que trate a espionaxe contra líderes independentistas cataláns ou a legalización do uso de galego, éuscaro e catalán no Lexislativo. Ademais, a Mesa tería que permitirlles acceder a grupo parlamentario propio, após non alcanzar 15% de sufraxios en todas as circunscricións nas que se presentou, unha situación na que tamén está Junts. Ao respecto da posición na votación do Partido Nacionalista Vasco (PNV), o seu voceiro no Congreso, Aitor Esteban, sinalou: “Nada que dicir, polo momento”. Ao tempo, a formación non descartou a repetición electoral como un dos posíbeis escenarios a partir de hoxe. Co fin de achegar posturas coas forzas soberanistas, o PSOE fixo público a terza feira que a súa candidata para presidir a Mesa do Congreso é Francina Armengol, tras dúas lexislaturas á fronte das Illes Balears nun Goberno de coalición que incluíu os soberanistas de Més, amais da súa defensa da normalización do catalán. Armengol é “mellor que moitos outros”, admitiu Francesc-Marc Álvaro, deputado de Esquerra Republicana. Ao outro lado estará Cuca Gamarra, a quen anunciou na tarde de onte o presidente do PP, Alberto Núñez Feixoo, como a súa alternativa para liderar a Mesa. O papel da Mesa A Presidencia da Mesa do Congreso determina as datas das sesións de investidura logo de que o xefe de Estado español, o rei Felipe VI, encargue a formación de Goberno a unha das candidaturas. Á vez, dirixe os debates ao longo do período lexislativo. Ademais, xunto ás catro Vicepresidencias e outras tantas Secretarías deseña o calendario do Pleno e das comisións, así como dispón sobre a validez das iniciativas parlamentarias que se presenten. Para elixir a persoa que ocupará a Presidencia, cada deputada e deputado conta cun voto, e aínda que na primeira votación é precisa a maioría absoluta, a partir da segunda votación -desde ese momento só entre as dúas candidaturas con máis apoios- é designada a persoa con máis votos. Xa no proceso de nomeamento das Vicepresidencias, repetirase a votación, sendo elixidas as catro candidaturas con máis sufraxios, e de igual forma se completan as catro Secretarías. Tendo en conta os resultados dos comicios, que outorgaron 171 escanos á suma de PSOE, Sumar, ERC, EH Bildu, PNV e Bloque Nacionalista Galego (BNG) -forzas que avalaron a anterior investidura de Sánchez-, os mesmos asentos que lograron conxuntamente o PP, a extrema dereita de Vox e Unión do Pobo Navarro, de negarse finalmente Junts a apoiar a candidata do PSOE á Mesa do Congreso será Cristina Valido, a única deputada de Coalición Canaria, a que terá a potestade de desempatar. O partido non divulgou a quen apoiará, mais goberna en Canarias grazas ao apoio do PP tras un pacto de lexislatura, entrementres, o presidente territorial e líder da formación, Fernando Clavijo, insistiu na proposta de que o PNV asuma ou a Presidencia ou a Vicepresidencia da Mesa do Congreso. Rego votará a favor da candidatura de Armengol O deputado do BNG no Congreso, Néstor Rego, comunicou onte que emitirá un voto favorábel á candidata do PSOE a presidir o Congreso, Francina Armengol, despois de alcanzar un compromiso coa forza estatal para o “recoñecemento da pluralidade existente no Congreso” e que se facilite “con flexibilidade o traballo de todas as forzas políticas representadas”. Rego detallou que unha vez elixida a Mesa do Congreso chegará “unha segunda fase” con vistas á investidura, na que avanzou que non haberá “un cheque en branco” para o PSOE, ao que instou a alcanzar “un acordo claro de cumprimento dos compromisos políticos coa Galiza que [..] é o que nos interesa”. Tamén salientou que a repetición electoral non “sería positiva para a sociedade”, mais non descartou que incluso coa elección de Armengol no Congreso se acaben por producir unhas novas votacións estatais. PSOE e PP chocan pola investidura O presidente español e candidato á reelección, Pedro Sánchez, asegurou onte que se presentará á investidura e pediu ao líder do PP, Alberto Núñez Feixoo, “que non prema o xefe do Estado nin se dedique a cábalas máxicas”, en referencia á intención do PP de presentar á investidura o seu candidato a pesar de carecer dos apoios necesarios.