Suráfrica e a dignidade de defender a legalidade internacional

A piques de facérense catro meses da última ofensiva de Israel sobre Gaza, as bombas seguen caendo sobre unha poboación que non deixa de acumular vítimas. Segundo os últimos datos das Nacións Unidas, contabilízanse en máis de 25.000 as persoas asasinadas, 62.000 feridas e 1,7 millóns de desprazadas. Entre tanta ignominia e escuridade, a denuncia presentada por Suráfrica contra Israel o pasado mes de decembro ante a Corte Internacional de Xustiza supuxo unha sorte de fósforo co que alumear novos escenarios. Por fin, un Estado movía ficha no taboleiro internacional deixando en evidencia a inacción e complicidade de case todas as potencias occidentais co criminal comportamento das autoridades de Israel. No seu escrito, Suráfrica afirmaba que as accións de Israel sobre Gaza se axustan á definición de xenocidio, tal e como o establece a Convención para prevención e sanción do crime de xenocidio de 1948, que especifica que o xenocidio inclúe actos "cometidos coa intención de destruír, total ou parcialmente, un grupo étnico, nacional, racial ou relixioso" e que, paradoxo da historia, foi promulgada tralos crimes de lesa humanidade cometidos polo nazismo contra, entre outros e, en primeiro lugar, o pobo xudeu. En canto ás medidas solicitadas, Suráfrica instaba a Corte a ordenar a suspensión inmediata das operacións de Israel en Gaza e contra Gaza. Así como a permitir a entrada de axuda humanitaria e á adopción de medidas razoables para evitar o xenocidio. Alto ao fogo O máximo tribunal das Nacións Unidas manifestouse o pasado 26 de xaneiro parcialmente a favor da demanda de Suráfrica e fíxoo cunha ampla maioría (15 sobre 17 votos) instando a Israel a limitar as mortes e danos causados pola súa ofensiva militar. Como primeira medida cautelar, o alto tribunal esixiu a Israel tomar "todas as medidas que estean ao seu alcance para evitar a comisión de todos os actos" recollidos no artigo 2 da devandita convención, que, entre outras cousas, prohibe "matar aos membros do grupo" ou "impoñerlles deliberadamente condicións de vida calculadas para provocar a súa destrución física total ou parcial". Como segunda medida, Israel debería "asegurarse con efecto inmediato de que os seus militares non cometen" ningún daqueles actos prohibidos pola Convención e adoptar "todas as medidas que estean no seu poder" para evitar e castigar a incitación directa e pública a cometer xenocidio" de civís en Gaza. Ao tempo, impoñía a Israel permitir o acceso de auga, alimentos e medicinas e a presentación dun informe coas medidas preventivas adoptadas. Mais, lamentablemente, non esixiu un alto ao fogo inmediato. É dicir, que Israel debe evitar o xenocidio, pero non se lle insta a parar a guerra. Porén, o tribunal aínda non emitiu unha sentenza substantiva sobre a cuestión central, isto é, non entrou aínda a xulgar se Israel está cometendo un xenocidio en termos legais. Con todo, confirmou a súa competencia prima facie sobre o asunto, isto é, polo menos a primeira vista, considera válido o argumento presentado por Suráfrica. Este paso non implica un veredicto sobre a culpabilidade de Israel, pero suxire que a Corte acepta a competencia para abordar o caso e cuxa resolución definitiva podería demorarse anos. O resto de Estados que fan parte das Nacións Unidas tardan xa en replicar demandas como a de Suráfrica que poñan límites a Israel Cambio de política Non é a primeira vez que o alto tribunal aborda cuestións vinculadas con ataques de Israel sobre Gaza. En 2003, a Asemblea Xeral das Nacións Unidas aprobou unha resolución na que solicitaba á Corte unha opinión consultiva sobre as repercusións xurídicas da construción dun muro ou valado por parte de Israel nos Territorios Ocupados. Naquela ocasión, o xulgado emitira unha opinión non vinculante que ordenaba a demolición ou desmantelamento de dito muro, así como a reparación dos danos causados. Opinión que, obvia dicilo, foi ignorada. Aínda que a Corte Internacional tampouco conta co poder para facer cumprir estas novas ordes e impedir que Israel continúe masacrando o pobo palestino, os Gobernos do resto de Estados que forman parte das Nacións Unidas tardan xa en replicar demandas como a de Suráfrica e esixir novas medidas de protección que poñan límites a Israel. Un paso necesario que sería só o primeiro dun cambio de política internacional para cumprir a máis básica legalidade internacional e deixar de ser cómplices máis ou menos incómodos da barbarie.