Os salarios dos políticos municipais

A pesar da proximidade e das afinidades entre a Galiza e Portugal, son notorias algunhas diferenzas importantes cos nosos veciños de alén Miño. Unha desas diferenzas está relacionada coas eleccións autárquicas e todo o que se deriva delas, e como organizan a vida municipal. En Portugal as persoas que se presentan ás eleccións municipais saben anticipadamente o que van cobrar porque a súa remuneración depende de dúas cuestións. Por unha parte está ligada ao salario bruto do presidente da república, de tal xeito que os alcaldes nunca poden ter un salario que supere o 50% do salario do xefe de Estado. E, por outra, os salarios tamén están ligados ao número de electores do concello. En municipios con menos de 10.000 electores, o vencimento é o 40% do salario líquido do presidente da república, o que quere dicir que a maioría dos alcaldes dos 308 concellos portugueses cobran uns 3.788 euros. En municipios con máis de 10.000 e menos de 40.000 electores a porcentaxe sobe ao 45% e, nos de máis de 40.000, cobran o 50%, agás os de Lisboa e O Porto que chegan ao 55% (algo máis de 5.000 euros ao mes, antes de impostos). Na remuneración mensual líquida inclúense os "subsídios extraordinarios", as "despesas de representação" e as "senhas de presença". Igualmente teñen fixado o seu salario os "vereadores com pelouros", que son responsábeis dos ramos da administración municipal como educação, obras e urbanismo, cultura… e traballan a "tempo inteiro" ou a "meio tempo". E o mesmo sucede nas Juntas de Freguesia. Transparencia Outra cuestión que me gustaría resaltar é que para poderen cobrar as "senhas de presença" os representantes locais que comparezan ás reunións, teñen que participar activamente e pronunciarse sobre todos os pontos tratados. Isto é, os que só van "quentar asento" non cobran. O feito de que xa estean fixados os salarios dos políticos penso que ten varias vantaxes. A primeira é que as persoas que se presentan ás eleccións municipais xa saben o que van gañar (ou perder). Serve para disuadir a quen queira presentarse ás eleccións co obxectivo de facer o agosto. Sería bo que os nosos políticos municipais tivesen regulado o salario, de acordo coas características do municipio, pois garante a transparencia dos gastos públicos e contribúe para a moralidade administrativa, de xeito que non teñamos que sorprendernos co establecemento de soldos arbitrarios, tan diferentes entre concellos coas mesmas características, ou mesmo superiores ao do presidente do Goberno, como o de Madrid. Ter un salario prefixado evita a inseguridade daquelas persoas que se queiran dedicar en exclusividade ao Concello Tamén evita, se non se obtén a maioría absoluta, ter que depender do que se decida no pleno de organización por parte da oposición, tal como sucedeu nestas últimas eleccións. As demoras e liortas á hora de fixar os salarios dos políticos nalgúns municipios sen maioría absoluta en que foron investidos varios alcaldes e alcaldesas a partir de acordos pouco firmes, unicamente serviron para crear unha certa inestabilidade. Ter un salario prefixado evita a inseguridade daquelas persoas que se queiran dedicar en exclusividade ao Concello, como sucede en Salceda, que levan tres meses sen soldo e sen seguro, tirando dos seus aforros para sobrevivir. Renuncias populistas Ou que se permitan decisións populistas como a do actual alcalde da Guarda, que disque renunciou ao salario por causa da "penosa e delicada situación económica das arcas municipais". Co seu "xeneroso" aforro, quere facer comungar con rodas de muíño os seus veciños, nunca mellor dito, pois antes foi cura, pois ao non ter soldo, vai poder cobrar a presidencia de todos os órganos colexiados do concello, como plenos, comisións informativas e xuntas de Goberno, ou doutros organismos como consorcios ou mancomunidades. E, como non, como deputado provincial. Que os políticos teñan un salario digno foi unha reivindicación histórica da esquerda para que non se puidesen dedicar só os ricos. Agora parece que se está a esquecer esta reivindicación. Non é nada recomendable porque, de cara ao futuro, a política local non pode quedar reservada a xubilados, a funcionarios, que non van ter problemas á hora de reintegrarse no seu posto de traballo, ou a xente que non ten traballo. A xente non está para perder boas oportunidades laborais ou ter que se encontrar con serias dificultades para reintegrarse ao seu antigo posto de traballo, despois duns anos na política.