O PP pacta con Vox en Estremadura 10 días despois da súa promesa de veto á ultradereita racista

O PP e Vox alcanzaron esta sexta feira un acordo para gobernar xuntos Estremadura. En base ao pacto, a popular María Guardiola tornará en presidenta da Xunta estremeña e o partido de Santiago Abascal asumirá a Consellaría de Xestión Forestal e Mundo Rural. O PP estremeño pacta un goberno con Vox dez días despois de afirmar que non o faría O acordo de Goberno chega despois de que a propia Guardiola, tan só hai dez días, negara de forma rotunda a entrada da extrema dereita no seu equipo: "Comprométome a non gobernar con Vox. Non podo deixar entrar no Goberno a aqueles que negan a violencia machista, a quen usa o trazo gordo, a quen está deshumanizando os inmigrantes e a quen desprega unha lona e tira á papeleira unha bandeira LGTB+", dixera a popular. Ambas as forzas políticas anunciaron o pacto nun comunicado conxunto. Posteriormente, Guardiola e o portavoz de Vox na Asemblea de Estremadura, Ángel Pelayo, asinaron o acordo no Parlamento estremeño. "PP e Vox asumiron así a responsabilidade de dotar a rexión dun Goberno estábel e cunha folla de ruta clara para pór fin ás políticas socialistas que lastraron o desenvolvemento de Estremadura", subliñaron PP e Vox. Segundo o comunicado, o acordo programático inclúe 60 medidas para "garantir un Goberno do cambio" e coas que se "revertan as consecuencias da inercia política do PSOE nos últimos anos". Segundo o PP e Vox, as medidas terán "repercusión directa" nos orzamentos xerais de Estremadura en cada exercicio. Progresistas e nacionalistas critican o acordo PP-Vox O secretario de Organización do PSOE, Santos Cerdán, acusou os populares de ter "principios de usar e tirar" e de "dobregarse ante a extrema dereita". Así mesmo, o socialista lamentou que Guardiola, ceda precisamente a Consellería de Xestión Forestal e Mundo Rural "aos negacionistas do cambio climático, aos das vacas e a tuberculose". "Gravísimo", engadiu Cerdán. Rueda di "entender" os 'baróns' do PP que pactan con Vox "en aras de garantir a estabilidade" O socialista facía referencia á decisión de Vox de flexibilizar os requisitos de control sanitario da tuberculose bovina en Castela e León, o que produciu a reacción do Executivo estatal, que presentou un recurso ante o Tribunal Superior de Xustiza de Castela e León para paralizar esta medida da ultradereita. Pola súa parte, a líder de Sumar, Yolanda Díaz, asegurou esta sexta feira que "a achega" do presidente do PP, Alberto Núñez Feixoo, ao Orgullo 2023, é "incorporar aos ultra de Vox aos Gobernos". Tamén se pronunciou o portavoz do BNG no Congreso, Néstor Rego, que sinalou que "este pacto [entre o PP e Vox en Estremadura] deixa claro que significa o Partido Popular, pois asumen as políticas regresivas e de recortes de dereitos da ultradereita". O lehendakari vasco e líder do PNV, Iñigo Urkullu, reprochou ao PP que teña como "compañeiro de viaxe" a unha forza política que, como Vox, pretende "suprimir" o autogoberno vasco. Tampouco pasaron por alto o achegamento dos populares españois á ultradereita os líderes políticos doutros Estados da Unión Europea (UE). Así o afirmou o líder do Executivo español, Pedro Sánchez, á saída do Consello Europeo en Bruxelas, desde onde asegurou que algúns líderes da UE mostráronse "contrariados" pola "involución" que se está producindo no Estado español a raíz dos pactos electorais alcanzados polo PP e por Vox. A ultradereita na UE A preocupación amosada (segundo Sánchez) polos lideres da UE en relación aos pactos entre unha forza política conservadora (o PP) e unha de ultradereita (Vox) concordan coa estratexia de illamento das forzas ultra que levan a cabo conservadores e liberais noutros Estados da UE. O líder da CDU descarta calquera pacto coa ultradereita alemá En Alemaña, o líder da Unión Demócrata Cristiá (CDU), Friedrich Merz, descartou de maneira categórica calquera pacto coa ultradereitista Alternativa para Alemaña (AfD), á que as sondaxes lle conceden agora unha lixeira repunta tras unha tendencia á baixa durante estes últimos anos. "Mentres sexa líder da CDU, non haberá ningún traballo conxunto con este partido. É xenófobo e antisemita, non temos nada que ver con esa xente", sentenciou Merz. En Francia levan décadas facendo o chamado "cordón sanitario" á Ultradereita No caso de Francia, o "cordón sanitario" á ultradereita é unha estratexia que seguiron a maioría de partidos políticos durante décadas, logrando impedir que as forzas de ultradereita obtivesen poder institucional. Tanto é asi que este pacto ten nome, a fronte republicana. Porén, a posición cada vez menos clara das fozas políticas no reforzamento da chamada fronte republicana rematou cun escenario no que nas últimas lexislativas, o partido de Marine Le Pen, Reagrupamento Nacional (RN), conseguiu pasar de oito a 89 representantes na Asemblea. Cando no ano 2000 en Austria se formou un Executivo de coalición que incluía un partido ultradereitista (a FPO), a UE impuxo sancións a este Estado. Máis de dúas décadas despois, as políticas restritivas de dereitos da ultradereita polaca e húngara levaron Bruxelas a adoptar medidas sancionadoras. Agora, a confrontación con Bruxelas tamén soa en Italia coa chegada da ultradereita ao Goberno, liderada por Giorgia Meloni e o seu partido Fratelli d'Italia. A dereita lusa négase a pactar con "racistas" e "xenófobos" Luis Montenegro, líder do conservador Partido Social Democrata (PSD), principal forza da oposición en Portugal, abriu no mes de xuño a porta a un eventual pacto poselectoral cos socialistas e descartou acordos con partidos "xenófobos e racistas", sen mencionar expresamente ao ultradereitista Chega. O PSD portugués fecha o paso á ultradereita de chega En caso de eleccións, "se non temos maioría absoluta, loitaremos por ter condicións de estabilidade, mais é preciso que o país saiba que é posíbel facer un goberno estábel e reformista dependendo da posición do partido que perda", dixo Montenegro nun encontro con correspondentes de outros Estados. Diferenzas entre as forzas conservadoras O líder do PSD ten previsto participar na campaña electoral do Estado español para apoiar Alberto Núñez Feixoo, o candidato do Partido Popular, que se reuniu co portugués durante a súa última visita a Lisboa. Ambos os políticos pelexan para lograr un cambio de ciclo político na península Ibérica e ambos, segundo as sondaxes, non teñen posibilidades de gobernar en solitario. Porén, existe unha gran diferenza entre os dous líderes conservadores, mentres Feixoo pacta sen ambaxes coa ultradereita, Montenegro descarta claramente esa posibilidade.