En Palestina a educación tamén é atacada

Os servizos educativos dentro dos 19 campos de refuxiados que existen en Cisxordania son proporcionados pola Axencia de Nacións Unidas para os Refuxiados de Palestina en Oriente Próximo (Unrwa). No campo de refuxiados de Xenín hai catro escolas —dúas femininas e dúas masculinas— que acollen un total de 1.694 estudantes de Primaria e Secundaria, segundo os datos do ano académico 2021/22. Garantir o acceso dos rapaces e rapazas a unha educación de calidade constitúe un dereito fundamental para fomentar o seu desenvolvemento cognitivo, social, emocional e creativo. As escolas deberían ser santuarios para a aprendizaxe e o crecemento interpersoal. Non obstante, tal e como explicou Lynn Hastings, Coordinador Humanitario da ONU en Cisxordania, o ano 2023 supuxo un desafío para o ensino en Palestina por diferentes motivos, en especial no campo de refuxiados de Xenín. Por un lado, desde o inicio do 2023 e durante o transcurso de máis de cinco meses, as escolas de Xenín viviron varios peches intermitentes. Estas interrupcións foron consecuencia dos desacordos laborais no seo dos sindicatos educativos, que convocaron numerosas folgas de diferente duración nas escolas públicas de toda Cisxordania. Durante meses, as crianzas e a mocidade do campo de refuxiados de Xenín non tiveron acceso a ningún tipo de aprendizaxe, nin informal nin formal. Por outro lado, desde a primavera de 2022 e todo ao longo do ano 2023, a rexión de Xenín experimentou un aumento exponencial da violencia por parte das forzas da ocupación. O campo de refuxiados de Xenín foi vítima de incursións militares de grande escala nos meses de xaneiro, xuño e xullo. A partir do mes de outubro, no contexto da Guerra de Gaza, as operacións militares volvéronse moito máis habituais, longas e intensas, tanto de día como de noite. As incursións sistemáticas dos soldados sionistas afectaron gravemente ás actividades da Unrwa. Evacuación das escolas O 9 de novembro, a plena luz do día e durante unha xornada escolar, o campo foi atacado polo exército israelí. A escasos metro do recinto escolar no que se atopan as dúas escolas femininas e unha das escolas masculinas, producíronse confrontacións entre o exército e membros da resistencia. Máis de 900 alumnos e membros do equipo educativo permaneceron refuxiados no recinto educativo durante máis de 8 horas, ata seren evacuados fóra do campo. Uns días antes, o 7 de novembro, 1.700 estudantes xa foran evacuados pola mañá por motivos de seguridade. Aulas suspendidas ou atrasadas As incursións militares, que normalmente se producen de madrugada, poden estenderse á mañá do día a seguir. Por este motivo, en diversas ocasións anunciouse a suspensión ou atraso das aulas. O 28 de novembro os soldados israelís irromperon no campo cedo pola mañá, levando a cabo unha operación militar de máis de 17 horas. Ese día as escolas permaneceron pechadas. O 6 de novembro, ante un novo ataque militar, as aulas comezaron máis tarde. Aulas virtuais Entre o 16 e o 21 de novembro as catro escolas do campo de refuxiados de Xenín permaneceron pechadas debido ao mal estado das estradas e rúas dentro do campo e nos seus arredores, tras seren arrasadas por máquinas escavadoras durante unha operación militar. Ante as dificultades e o perigo de acceso aos centros de ensino, o alumnado tivo clases de forma remota. O mes anterior, o 22 de outubro, tamén se produciu a mesma situación. Por causa dunha operación militar, a docencia foi en liña. Crianzas e adolescentes están expostos a elevados niveles de violencia e son testemuñas de arrestos e asasinatos aleatorios No campo de Xenín as crianzas e os adolescentes están expostos a elevados niveles de violencia e son testemuñas dos arrestos e asasinatos aleatorios de familiares e veciños. As escolas rexistraron un aumento do absentismo nos últimos meses e o profesorado detectou máis problemas de concentración e de participación entre o alumnado. Outras escolas da rexión de Xenín tamén sufriron o impacto da escalada da violencia e do incremento da presencia e presión das forzas da ocupación. Desde o 7 de outubro, en numerosas vilas nos arredores da cidade de Xenín o exército instalou barras ou portas metálicas nas entradas de acceso ás vilas, así como lousas de formigón ou muros de terra para pechar estradas e camiños. Ante esta restrición do movemento, en varias ocasións tanto os estudantes como o profesorado non puideron acceder ás escolas. Segundo a Oficina de Coordinación de Asuntos Humanitarios das Nacións Unidas (OCHA), o ano 2023 foi o máis mortífero para os palestinos e palestinas en Cisxordania e Xerusalén Leste desde que a axencia comezou a rexistrar as mortes en 2005. Durante o ano 2023, en Cisxordania e Xerusalén Leste, 511 palestinos foron asasinados polas forzas da ocupación israelí e por colonos, e 12.769 resultaron feridos. Só entre os meses de outubro e decembro contabilizáronse 307 vítimas mortais. Unha das áreas co maior número de palestinos asasinados é Xenín.