Novos-vellos proxectos para bailar co PP

O PP está mais só que a lúa. A falida investidura de Feixoo foi a mellor proba de súa situación de senlleiro, de illamento no Congreso. Só contou co apoio de Vox (33 votos) máis os de CC (1) e UPN (1). Durante un mes, Feixoo foi incapaz de sumar ninguén. O ex presidente da Xunta fartouse no debate de repetir que "podendo ser presidente, non quero". Cinismo puro e duro, xa que non era cuestión de vontade ou desexo, senón de aritmética. Porén, despois de falar co PNV e con Junts, os dous rexeitaron dar os seus apoios. Ou mellor dito, rexeitaron dar o apoio pola presenza de Vox. Sen os voxianos tampouco saían as contas en Génova. Feixoo desexaba ser presidente do Goberno e queda como chegara ao debate: líder da oposición. Hoxe teno aínda mais difícil que onte, pois no debate rachou as pontes co PNV. "Se hai que elixir entre Feixoo e amnistía; elixo amnistía", rematou o portavoz do grupo parlamentar Aitor Esteban, despois de ter escoitado moitas alusións ao seu partido e EH-Bildu. Nostálxicos do réxime do 78 traballan en "novos" partidos en axuda do PP Unha posibilidade é que nas vindeiras eleccións o PP medre moito, ou ben que o fagan seus actuais socios. Máis difícil aínda. Outra posibilidade é que xurdan novas forzas que non teñan tantos prexuízos en facerse fotos con Abascal. Tampouco esta alternativa é doada, pero os nostálxicos do réxime do 78 xa están traballando nesa dirección como fixeran no seu día cando viron perigar o bipartidismo. Nos mesmos días do debate da investidura os medios de Madrid facíanse eco de dous "novos" proxectos que viñan xestándose dende o verán. Os dous con nomes "vellos" dos fracasados UPyD e C's. Un é Nexo, que se presenta como plataforma. Din que non quere ser un partido pero si concorrer ás eleccións. Trátase, entre outros, dos Bal e os ex socialistas Corcuera e Soraya Rodríguez, e o ex 'ciudadano' Igea, que tamén aparece como asinante en Tercera España, o outro proxecto –este con nome con reminiscencias guerracivilistas–, que non agocha a súa intención de ser un "novo" partido que apoian os Savater, Ezquerra, Trapiello, Bustelo, Redondo... xunto a outros persoeiros do españolismo máis rancio e inimigos abertos de Pedro Sánchez, coa mirada posta nas eleccións europeas de maio de 2024. Xa veremos se rematan ou morren polo camiño sen chegar a bailar de parella (ou trío) con PP e Vox, aos que no debate faltoulles bicarse na boca. É posíbel a aparición de "novas forzas". É certo que Galiza está á marxe destes movementos e onde non ten espazo político. Pero non está de máis lembrar que Feixoo cando estaba na Galiza rexeitaba falar de Vox, e se o facía era para chamarlles polo seu nome; "fascistas". Agora resulta que son "patriotas". É posíbel que pense que o seu achegamento ao sector máis duro do PP, lle garante que non lle vaian mover a cadeira do sétimo andar da rúa Xénova, e que Abascal deixe de chamarlle "derechita cobarde" ou ter que escoitar asubíos e berros de "Ayuso, Ayuso, Ayuso" nas concentracións. Está por ver canto dura [Feixoo]. As bicis non son para PP-Vox O PP asumiu o discurso de Vox, con quen goberna xa en sete comunidades. Castela e León foi a primeira en abril de 2022, as outras, despois das eleccións de maio deste ano: Aragón, València, Illes Balears, Cantabria, Estremadura e Murcia. Tamén gobernan xuntos en 18 capitais de provincia. A chegada a Madrid de Feixoo coincidiu coa entrada no Goberno de Castela e León de Vox. O entón flamante presidente do PP non quixo saber nada de cordóns sanitarios á extrema dereita, e nestes meses asistimos a esperpentos como que o concelleiro de Saúde Pública e Seguridade Ciudadana de Valladolid, Alberto Cuadrado (Vox), coa colaboración do Concello, faga campaña protabaco repartindo polas rúas milleiros de cinseiros; ou que o conselleiro de Cultura, Turismo e Deportes da Junta, Gonzalo Santonja (Vox), apoie a tauromaquia con talleres para que nenos aprendan a facer e a cravar banderillas... Outras medidas xa en marcha son a eliminación de carrís bici, de bus-taxi e das Zonas de Baixas Emisións (ZBE). Todas elas son infraestruturas feitas con cartos de Europa que terán que ser devoltos se se eliminan o non se fan antes do remate do 2023. PP-Vox pódense chamar tamén os partidos do auto. Con PP e Vox, as políticas ambientais e de mobilidade sostíbel deron un troco drástico nas cidades, que volverán ser tomadas polos autos se o movemento veciñal e os ecoloxistas non impiden a aprobación das novas Ordenanzas. Ademais do diñeiro dos Next Generation a devolver, está en perigo a saúde de centos de milleiros de persoas, moitas falecerán pola contaminación. Neste, como noutras moitas cousas –violencia de xénero, aborto, LGBTI–, o negacionismo climatolóxico de Vox ten calado no PP. Menos mal que nos queda Pontevedra!