Segundo o xornal vasco Gara, 76.000 persoas en Bilbo e 9.000 en Baiona secundaron a mobilización, que comezou ás 17.24 horas da tarde do sábado. O 65% dos alcades de Ipar Euskal Herria apoiaron a protesta.
“No perdan de vista o que hoxe se está a vivir en Bilbo e Baiona”, avisou Joseba Azkarraga, de Orain presoak, ao Goberno español, “mentres os cárceres non se baleiren estaremos ante unha resolución do conflito inconclusa”.
Ao remate da manifestación de Bilbo interviñeron o filósofo Javier Sádaba e a xornalista Pilar Kalzada. Esta última lembrou os presos políticos cataláns e os mozos de Altsasu e afirmou que o Goberno de Pedro Sánchez “non cumpre a palabra dada. É o intre de que se cumpra a lei”. A liberación de presos gravemente enfermos e de avanzada idade, o cómputo de condenas noutros Estados europeos e a fin da política de dispersión foron os eixos centrais das súas reivindicacións.
A maiores, Kalzada esixiu que o novo Estatuto do País Vasco -en tramitación no Parlamento de Gasteiz- “recolla o dereito do preso a cumprir condena preto do seu domicilio. É sinxelamente cumprir a lei, máis nada”.
