O Mar Vermello, perto dunha nova guerra após os ataques de Londres e Washington en Iemen

Centos de miles de persoas saíron esta sexta feira ás rúas de Saná, a capital de Iemen, en protesta polos bombardeos efectuados polos Estados Unidos de América e o Reino Unido. Os hutís, que controlan Saná e a maioría do leste deste Estado, aseguraron que os EUA, o Reino Unido e Israel atópanse bombardeando numerosas cidades de Iemen, ao que estarían respondendo con ataques contra barcos e avións. O seu portavoz, Mohamed Abdusalam, denunciou unha "flagrante agresión" que non conseguirá "disuadir Iemen de apoiar Palestina". "Non hai absolutamente ningunha xustificación para esta agresión contra Iemen, xa que non había ningunha ameaza á navegación internacional nos mares Vermello e Arábigo, os ataques afectaron e seguirán afectando barcos israelís ou aqueles que se dirixen aos portos da Palestina ocupada", dixo o representante do grupo iemení. Os hutís denunciaron a morte de cinco membros do grupo polos bombardeos e advertiron que a "agresión criminal non quedará sen resposta e castigo". "As Forzas Armadas iemenís non dubidarán á hora de atacar as fontes das ameazas e todos os obxectos hostís por terra e mar en defensa de Iemen, a súa soberanía e a súa independencia", recalcou o portavoz de operacións militares dos hutís, Yahta Sari. Antes, Mohamed Alí al Huti, o presidente do Goberno estabelecido polos hutís, que controlan Saná, a capital de Iemen, desde 2015, denunciou uns bombardeos "bárbaros e terroristas" que "demostran que son eles [os EUA e o Reino Unido] quen xestionan a agresión contra Gaza". Os Estados Unidos de América e o Reino Unido bombardearon nas últimas horas posicións dos hutís en Iemen, segundo confirmou esta sexta feira o presidente dos EUA, Joe Biden. "As forzas militares estadounidenses, xunto co Reino Unido e co apoio de Australia, Bahrein, Canadá e os Países Baixos, levaron a cabo con éxito ataques contra varios obxectivos en Iemen empregados polos rebeldes hutís que puñan en perigo a liberdade de navegación nunha das rutas de máis importantes do mundo", declarou. Os EUA e o Reino Unido lanzan un grande ataque con bombas contra posicións hutís no Iemen Posteriormente, o primeiro ministro do Reino Unido, Rishi Sunak, tamén confirmou a participación da Forza Aérea Británica na operación conxunta. "A pesar das repetidas advertencias da comunidade internacional, os hutís seguiron levando a cabo ataques no mar Vermello, incluso contra buques de guerra do Reino Unido e dos Estados Unidos", afirmou o líder inglés. Pola súa parte, o primeiro ministro neerlandés, Mark Rutte, xustificou o ataque polo "dereito á defensa propia". Pola súa parte, o Goberno de Canadá, defendeu que a agresión contra Iemen é "consistente" coa Carta das Nacións Unidas (ONU). Guerra "sen autorización" Biden está a ser criticado a raíz da súa decisión de lanzar ataques contra Iemen sen a aprobación do Congreso. "O presidente ten que acudir ao Congreso antes de lanzar un ataque contra os hutís no Iemen e involucrarnos noutro conflito en Oriente Medio. Iso é o Artigo I da Constitución. Defenderei iso independentemente de se hai un demócrata ou un republicano na Casa Branca", afirmou o congresista demócrata Ro Khanna. "Só o Congreso ten o poder de declarar a guerra", engadiu o lexislador republicano Thomas Massie. Sunak tamén recibiu críticas similares. "Se o Reino Unido pretende emprender unha acción militar, é vital que haxa unha votación no Parlamento", sinalou a liberal Layla Moran. O ministro principal de Escocia, o nacionalista Humza Yousaf, aseverou que "o Reino Unido non ten un bo historial de intervención militar en Oriente Medio. Corresponde convocar a Westminster, informar os parlamentarios e permitirlles debater". Os ataques hutís desde o Iemen en defensa de Gaza impactan no comercio mundial O Goberno chinés pediu calma a todas as partes implicadas na crise aberta desde hai semanas no mar Vermello. "A China expresa a súa preocupación polo incremento da tensión no mar Vermello e pide a todos os implicados que manteñan a calma e fagan un exercicio de contención para evitar un novo agravamento do conflito", manifestou esta sexta feira o portavoz do Ministerio de Exteriores chinés, Mao Ning. Rusia solicitou manter unha reunión urxente do Consello de Seguridade da ONU en relación cos ataques perpetrados contra o territorio de Iemen. A portavoz do Ministerio de Exteriores ruso, Maria Zajarova, sinalou que o ataque supón "outro exemplo da distorsión dos anglosaxóns das resolucións do Consello de Seguridade da ONU e o seu total desprezo polo Dereito Internacional". Así, dixo que o que perseguen estes Estados é "escalar a situación na rexión en beneficio dos seus obxectivos destrutivos". Pola súa parte, o presidente de Turquía, Recep Tayyip Erdogan, cualificou de "desproporcionado" o ataque, antes de alertar de que os EUA e o Reino Unido poderían converter a zona nun "baño de sangue" e de eloxiar a "defensa" dos hutís fronte á agresión. "Irán busca agora como protexerse", puntualizou. Precisamente o portavoz do Ministerio de Exteriores iraniano, Naser Kanani, condenou "enerxicamente" o ataque e dixo que supón "unha clara violación da soberanía e integridade territorial de Iemen que alimentará a inestabilidade na rexión". Arabia Saudita, rival dos hutís, chamou a "evitar unha escalada" Incluso Arabia Saudita, que lidera a coalición contra os hutís no marco da guerra civil iemení (que comezou en 2014 e que agora se atopa en tregua), fixo público un chamamento á "moderación" e a "evitar unha escalada" tras un ataque que está "seguindo con preocupación". O Iemen camiña cara á paz A escalada do conflito podería implicar un desastre para a economía mundial As augas do mar Vermello, que conectan o mar Arábigo co canal de Suez, son de vital importancia para o comercio de bens e subministracións enerxéticas. De feito, tras o ataque dos EUA e o Reino Unido sobre as posicións hutís en Iemen, o prezo do petróleo Brent, de referencia en Europa, chegou a superar esta sexta feira por primeira vez no ano os 80 dólares por barril, cunha suba ao final do día de 2,75%, até os 79,54 dólares por barril. Un bloqueo do estreito de ormuz alzaría moito o prezo do petróleo Polo mar Vermello transcorre até 15% do comercio internacional. Porén, no caso dos combustíbeis, as consecuencias sobre os prezos serían moito maiores no caso dunha escalada maior das tensións en Oriente Medio que puideran bloquear o estreito de Ormuz. Alén do plano comercial, no xeoestratéxico, as augas do mar Vermello tamén supoñen a vía para moitas das subministracións que os aliados de Israel lle fan chegar. Ademais, o canal de Suez desemboca no mar Mediterráneo, e polo tanto, o mar Vermello é unha vía importante para chegar ás augas de Palestina. Por estes motivos, e no marco do seu compromiso na defensa do pobo palestino, os hutís están a atacar no mar Arábigo e no mar Vermello, segundo afirman, os buques israelís e os que axudan este Estado, así como aqueles que se dirixen ás augas da Faixa de Gaza. Os hutís controlan Saná, capital de Iemen, desde 2015, así como a maioría do leste deste Estado. Arabia Saudita, que lidera a coalición contra os hutís na guerra civil de Iemen (agora en tregua), non participou nos ataques dos EUA e o Reino Unido, mais si o fixo un dos Estados petroleiros do golfo pérsico, Bahrein.