Imos contar mentiras, tralará

"Rematáronse os privilexios fiscais da Igrexa católica en España", anunciou aos catro ventos o ministro da Presidencia, Relacións coas Cortes e Memoria Democrática, Félix Bolaños. O anuncio, moi agardado por calquera demócrata, fíxoo despois dun encontro coa Conferencia Episcopal española a finais do mes de abril. Aínda que chove sobre mollado, o PSOE, de novo mentiu. A súa napia –se fose Pinocho– hai tempo rachou todos os récords imaxinables. O acordo achegado entre o Goberno e o cumio da Igrexa non é outra cousa que a equiparación do réxime fiscal de todas as confesións relixiosas que antes tiñan a Igrexa Católica, a Federación de Entidades Relixiosas Evanxélicas, a Federación de Comunidades Israelitas e a Comisión Islámica, e agora se fai extensible á Igrexa Ortodoxa, á Unión Budista, á Igrexa de Xesucristo dos Santos dos Derradeiros Días (mormóns) e aos Testemuñas de Xehová. É dicir: "Café para todos". Os beneficios fiscais son os mesmos que xa desfrutaban poucas confesións máis certas ONG, fundacións, etc. Privilexios O asinado polo ministro Bolaños e polo bispo Juan José Omella en presenza do nuncio en España, o arcebispo Bernardito Auza, non ten nada que ver co dito dende a Moncloa: "A Igrexa Católica renuncia aos privilexios". É un engano, unha falsidade, unha trola, unha mentira, unha loiada... un asunto sensible. O sometemento á Igrexa mantense, como a submisión á OTAN Temos que lembrar que o artigo 3º da Constitución da República Española de 1931 di: "O Estado español non ten relixión oficial". A República derrogou o Concordato de 1851, asinado no reinado de Isabel II. Despois da Guerra Civil, Franco recuperou unha serie de acordos que remataron o 27 de agosto de 1953 cun novo concordato asinado semiclandestinamente polo papa Pío XII e o ditador, que ademais de botar un pouco de auga limpadora sobre o réxime antidemocrático, garantía o nomeamento dos bispos. Un mes despois houbo outros acordos con Estados Unidos, os Pactos de Madrid. Uns e outros vixentes hoxe en día. En moitísimas ocasións temos escoitado aos dirixentes do PSOE promesas do fin do Concordato. Dende Alfredo Pérez Rubalcaba a Rodríguez Zapatero pasando por Pedro Sánchez. Aínda que fose recollido nos relatorios congresuais ou en programas electorais, o sometemento á Igrexa mantense como a submisión a OTAN. Temos asistido a espectáculos vergoñentos de persoeiros autochamados socialistas, como os desenvolvidos por carcamáns fachas coma Paco Vázquez, que ademais de especulador foi alcalde da Coruña, deputado e embaixador ante o Vaticano de 2006 a 2011. Egrexio come hostias! Mentres tanto, outros políticos (non todos son iguais, temos que repetilo), como é o caso de Francisco García Suárez cando fora alcalde de Allariz (2000-2018), denunciou e levou ao xulgado contencioso-administrativo os privilexios da Igrexa co tema do IBI, mecenados e demais chanchullos. Outra igrexa O ministro Bolaños estimou que serán 16 millóns de euros anuais –cantidade ridícula– os novos ingresos que terán os Concellos polo acordo. O Estado dedica todos os anos máis de 6.000 millóns de euros á educación concertada en mans da Igrexa, que segue nomeando os docentes de relixión e capeláns que pagamos con diñeiro público. Bolaños nada dixo de que a Igrexa pague o IBI. Por non falar do escándalo das inmatriculacións, favorecido por José María Aznar, que converteu a Igrexa Católica na maior inmobiliaria e que o PSOE mantén. A verdade, non sei coma aínda temos a capacidade de abraiarnos cos socialistas: OTAN, Sáhara, lei mordaza, reforma laboral, pensións, secretos oficiais, memoria histórica (hoxe democrática)... Son tantas as promesas incumpridas. Outras non tanto; por exemplo da reforma laboral Yolanda Díaz xa dixo ao mes de tomar posesión coma ministra de Traballo e Economía Social e vicepresidenta segunda que a súa derrogación total "sería irresponsable". E xa que falamos da filla de Suso, lembrar que ela tamén foi a Roma a axeonllarse diante do Papa no Nadal de 2021. Señor Bolaños, deixen de enganar. Non mintan tanto. É mellor que fagan un convite a todo os cidadáns para inventar unha Igrexa, como ten feito o xenial cómico Leo Bassi con súa Igrexa Patólica na que rende culto ao Deus Parrulo. Os galegos e galegas podemos fundar e rexistrar igrexas para honrar a vaca o ao porco, porque a lei sobre a liberdade de conciencia que garanta a laicidade do Estado con vós vai para longo. Para moi longo.