Viktor Orbán logrou a súa terceira vitoria consecutiva nunhas eleccións húngaras, país que goberna desde 2010 e que nas urnas vén de validar este representante da dereita dura e anti-inmigración para gobernar catro anos máis. A amplitude da vitoria -case 50% dos sufraxios- sorprendeu os propios analistas, máxime cando esta se deu nun contexto de alta participación (70%). Para completar o cadro, a segunda forza máis votada foi a extrema dereita, Jobbik, con 20% dos sufraxios.
Así pois, entre dereita extrema e extrema dereita suman 70% dos votos. Fidesz, a organización de Orbán, obtivo 133 escanos e 27 os de Jobbik. A esquerda apenas foi quen de gañar na capital, Budapest, onde triunfou a coligazón de esquerdas socialdemócratas, que logrou 20 deputados.
A Coligazón Democrática, de esquerdas, sobrepasou o limiar do 5% dos votos e obtén case unha decena de escanos mentres que os ecoloxistas fican con 7. A campaña pivotou sobre a axenda posta polo presidente Orbán: combater a inmigración e ataques a todos os que considera inimigos de Hungría.