A Fiscalía pede prisión sen fianza para Trapero
Os aparatos coercitivos do Estado non declararon ningunha tregua. A Fiscalía da Audiencia Nacional pediu esta segunda feira prisión sen fianza para Josep Lluís Trapero, major dos Mossos d'Esquadra, que enfronta cargos por sedición.
A Fiscalía da Audiencia Nacional -no Estado español o MInisterio Público depende hierarquicamente do Executivo- solicita como medida cautelar a prisión para Trapero, ao que se lle imputa non ter impedido a realización do referendo de 1 de Outubro, suspendido polo Tribunal Constitucional.
Será a xuíz instrutora Carmen Lamela a que decidirá, esta mesma tarde, se aceita ou non a medida cautelar.
Lamela ditou unha resolución favorábel para a número dous dos Mossos, Teresa Laplana, quen tamén prestou declaración esta segunda feira e para quen a Fiscalía pedía prisión eludíbel cunha fianza de 40 mil euros. Lamela non atendeu a petición do Ministerio Público e deixou en liberdade Laplana coa única medida cautelar de lle retirar o pasaporte e de a obrigar a comparecer cada 15 días.
Todo o caso contra Trapero e Lamela alicérzase en informes da Guardia Civil -un corpo militar que, afirman xuristas, segundo o Estatuto de Autonomía de 2006 non debería ter competencias sobre a seguranza interior en Catalunya- en virtude dos cales os mandos dos Mossos terían tido unha "actitude pasiva" durante o 1-O.
Os Mossos desmenten esa pasividade, enfatizan que eles tamén fecharon colexios eleitorais durante o referendo e salientan que o 1-O se limitaron a cumprir as ordes da xuíz do Tribunal Superior de Xustiza de Catalunya que os mandataba a impedir a realización do referendo mais sen contribuír para a alteración da orde pública e mediante o uso proporcionado da forza. Os Mossos levantaron actas da pretensa infracción da lei -en realidade das medidas cautelares do TC- en multitude de colexios eleitorais, mais optaron por non cargar contra as persoas, como si fixeron Policía Nacional e Guardia Civil, en accións que acabarían sendo denunciadas por Human Rights Wacht.
