Hoxe transcendeu que o Ministerio Público catalán iniciou as pescudas arredor da investigación policial a Martín Rodríguez Sol, ex fiscal superior do territorio, no contexto da ‘Operación Catalunya’, unha iniciativa do Goberno español de Mariano Raxoi e o Partido Popular (PP) entre 2011 e 2018 para espiar sen control xudicial dirixentes ou persoas vinculadas co independentismo catalán e filtrar información falsa a medios afíns para desacreditalas.
A investigación, fundamentada nas publicacións a pasada semana dos xornais elDiario.es, ElNacional.cat e La Vanguardia, parte dos documentos remitidos por distintas unidades da Policía ao Executivo, algúns dos que chegaban ao propio Raxoi.
Un deles, asinado pola Unidade de Asuntos Internos, relacionaba o daquela fiscal xefe catalán con Unió Democràtica de Catalunya, con posterioridade ao seu intento de investigar os documentos falsos elaborados polos implicados na ‘Operación Catalunya’.
A Fiscalía do Tribunal Superior de Justícia de Catalunya ratificou que a suposta investigación contra Rodríguez Sol “xamais chegou a ser posta en coñecemento de ningún órgano xudicial nin do Ministerio Fiscal” aínda que os axentes policiais estaban “legalmente obrigados” a trasladarlla.
Tres delitos
Para o Ministerio Público, as accións contra Rodríguez Sol poderían constituír un delito contra a súa intimidade, de prevaricación administrativa e de falsidade documental.
Expulsión de menores
Á vez, o Tribunal Supremo sentenciou que a expulsión de menores non acompañados de Ceuta a Marrocos en 2021, impulsada polo Goberno español, foi ilegal, polo que o condenou a pór en marcha as medidas precisas para o seu retorno ao Estado.