A histórica destitución de McCarthy deixa un Congreso ingobernábel nos Estados Unidos

Kevin McCarthy, até o de agora presidente da Cámara de Representantes dos Estados Unidos, e polo tanto terceira máxima autoridade dos EUA despois do presidente, Joe Biden, e da vicepresidenta, Kamala Harris, foi destituído nunha histórica sesión da institución, pois é a primeira vez que o liderado da Cámara é deposto nunha moción de censura. Joe Biden pide o apoio dos republicanos para enviar axuda financeira e militar a Ucraína A votación de destitución tan só se utilizou en dúas ocasións, ambas falidas e tamén contra líderes republicanos: en 1910 contra Joseph Cannon, que a superou, e contra John Boehner en 2015, ano en que non chegou a someterse a voto, mais tras a cal este último acabou dimitindo. McCarthy pasará á historia como un dos presidentes da institución co mandato máis curto, de 269 días, tras acceder ao cargo o pasado 7 de xaneiro substituíndo a demócrata Nancy Pelosi, unha vez que os republicanos recuperaron a maioría na Cámara nas eleccións de metade de mandato o pasado ano 2022. Após prosperar a moción de censura, McCarthy deixou claro que non volverá optar ao cargo. "Non me volverei presentar á Presidencia da Cámara. Quizais hoxe perdese unha votación, mais loitei polo que creo, e creo nos Estados Unidos de América. Foi unha honra servir o país", afirmou en declaracións aos medios após ratificarse a súa destitución, na terza feira, por 216 votos a favor e 210 en contra. Apoiaron a moción os 208 demócratas presentes e oito republicanos díscolos. Os republicanos máis conservadores consideran McCarthy un "traidor", logo de que alcanzase o pasado sábado sobre a bucina un pacto co Partido Demócrata que impediu o 'fechamento' do Goberno ante a falta de acordo para aprobar os orzamentos. Así, o Congreso deu luz verde a unha prórroga orzamentaria de mes e medio, que fracturou o Partido Republicano e que deixou fóra os fondos para enviar armas a Kíiv. A moción de censura foi impulsada pola facción ultraconservadora dos republicanos, cuxa cabeza visíbel é o congresista Matt Gaetz. Cando o agora ex presidente da Cámara de Representantes dos Estados Unidos chegou ao cargo, as votacións foron bloqueadas de forma sucesiva polos opositores dentro da súa propia formación, Gaetz incluído, que se abstivo nas dúas últimas. Naquela altura, McCarthy tamén fixera historia ao ser o único nun século en non ser elixido en primeira rolda. Pola súa parte, o republicano Patrick McHenry asumirá o posto de maneira interina. O propio McCarthy presentara en xaneiro unha lista de sucesión ao secretario da Cámara de Representantes, na que figuraba o nome do político, achegado ao presidente destituído, como a persoa máis apta para substituílo. O político foi nomeado portavoz pro tempore da institución, o que significa que só pode facer recesos na Cámara, levantar as sesións e recoñecer os nomeamentos de presidentes. Ao ser a primeira vez que o presidente perde o seu cargo nestas circunstancias, McHenry atópase nun terreo novo e inexplorado, mais o que queda claro é que non poderá gozar dos mesmos poderes que tiña McCarthy. Aínda que as normas da Cámara de Representantes non estabelecen un prazo fixo para a escolla dunha nova Presidencia en caso dunha vacante, é esperábel que a votación non se demore demasiado no tempo, debido ás limitacións de funcionamento derivadas da situación actual. Segundo reportou o xornal The Washington Post, a institución tomará un descanso dunha semana e espérase que a elección da nova Presidencia teña lugar o 11 de novembro. Demócratas e republicanos poden presentar agora os seus propios candidatos, que deben superar a maioría dos votos para obter o cargo. O orzamento para Ucraína esgotarase en dous meses Unha das incógnitas é se a nova Presidencia será quen de propiciar un acordo para a renovación das contas, pois entres outras partidas, os fondos de apoio bélico e financeiro dos EUA a Ucraína esgotaranse "nun par de meses" sen un novo orzamento anual, segundo asegurou o portavoz do Consello de Seguridade dos Estados Unidos, John Kirby. A UE tenta superar a división sobre o envío de armas a Ucraína cunha reunión en Kíiv "Creo que, dado o que nos queda [dos fondos aprobados] e dado o ritmo ao que estivemos prestando apoio [a Ucraína], estamos falando dun par de meses ou así, aproximadamente [para que se esgote o orzamento]", afirmou. "Depende do que estea pasando no campo de batalla, do grandes que sexan os paquetes e de que capacidades necesite Ucraína", engadiu o portavoz. "Sabemos que a contraofensiva non foi tan lonxe nin tan rápido como os ucraínos querían", continuou. "O tempo non é o noso amigo. Temos de seis a oito semanas máis de bo tempo antes de que as cousas se poñan realmente difíciles para ambos os bandos", sinalou. "Calquera interrupción no financiamento vai ser prexudicial para Ucraína", concluíu Kirby, que defendeu que os EUA teñen a capacidade de produción necesaria para satisfacer as necesidades de Kíiv. Republicanos apostan por Trump para a Presidencia Tras a recente destitución de Kevin McCarthy como presidente da Cámara de Representantes dos Estados Unidos de América, varios congresistas republicanos apostaron polo ex presidente dos EUA, Donald Trump, como substituto. Trump carga contra a fiscal e o xuíz ao chegar á Corte Suprema de Nova York Aínda que até o de agora, os lexisladores da Cámara de Representantes sempre elixiron un dos seus membros para presidir a institución, a Constitución dos Estados Unidos de América non di que este posto teña que ocupalo un membro electo. De feito, varios republicanos xa propuxeran Trump antes de que McCarthy fose electo, mais o ex mandatario negouse a esta posibilidade. Troy Nehls levará a proposta á Cámara O representante do Partido Republicano, Troy Nehls, indicou que proporá a candidatura de Trump para o posto. "Cando a Cámara de Representantes dos EUA volva reunirse, a miña primeira orde do día será nomear a Donald J. Trump como presidente da Cámara", dixo Nehls. "O presidente Trump, o mellor presidente da miña vida, ten un historial probado de pór os Estados Unidos en primeiro lugar e fará que a Cámara volva ser grande", destacou. Máis representantes do partido conservador, como é o caso de Marjorie Taylor Greene, apoiaron xa esta proposta.