O ex diputado do Partido Popular Jaime Ignacio del Burgo confirmou que José María Aznar autorizou o pago dunha “compensación económica” -que aparece nos papeis de Bárcenas- por 24000 euros a un cargo público entre decembro de 1991 e outubro de 1992.
A declaración esta terza feira do ex deputado popular durante a sesión do xuízo polo pago en diñeiro negro dunha parte das obras na sede do PP na rúa Génova sinalou como o entón presidente do PP tramitou estes pagos para Calixto Ayesa cando asumiu unha Consellería no Goberno de Nafarroa, que dirixía Unión del Pueblo Navarro, naquela altura, a marca do PP no territorio.
Del Burgo afirmou que despois de ter esa conversa con Aznar recibiu a chamada do tesoureiro do PP, Álvaro Lapuerta (xa defunto), quen lle comunicou que comezaría a entregarlle os cartos “en metálico e de forma periódica”.
Aproveitando as súas viaxes a Madrid pola súa condición de deputado, Del Burgo recollía os cartos e entregáballos a Ayesa.
Ademais de Del Burgo, tamén o ex deputado do PP Eugenio Nasarre admitiu que os apuntes sobre entregas de diñeiro na presunta contabilidade B do PP nas que aparecen os seus nomes son verídicos. Súmanse aos de Luis Fraga -ex senador do PP-, Cristóbal Páez -ex xerente do partido- e Luis Bárcenas, que xa recoñeceron a súa validez.
Negan as acusacións
Nesta sesión do tribunal tamén declararon Javier Arenas, ex deputado e ex secretario xeral do PP, e Jaume Mata, ex ministro e ex presidente das Illes Balears, que negaron ter recibido os cartos ao seu nome nos papeis de Bárcenas, se ben o primeiro aceptou que algúns dos apuntamentos da contabilidade B poden ser certos.
Despois chegou a quenda de declarar coma testemuñas de Pío García Escudero, ex presidente do Senado, Francisco Álvarez Cascos e María Dolores de Cospedal, ex secretarias xerais do PP, que negaron a existencia dunha contabilidade B no Partido Popular.