Cara á anexión de Cisxordania

En decembro Benjamin Netanyahu volveu ao cargo de primeiro ministro de Israel liderando o Goberno máis extremista da historia do país, un goberno de coalición do que forman parte colonos radicais como Itamar Ben-Gvir, líder de Poder Xudeu e Ministro de Seguridade Nacional, e Bezalel Smotrich, líder do Partido Sionista Relixioso e Ministro de Finanzas, que tamén se encarga da administración civil en Cisxordania e con poder total en materia de asentamentos nos territorios ocupados. Ben-Gvir e Smotrich viven en asentamentos ilegais en Cisxordania e destacan pola súa inflamatoria retórica, son francos en relación coa súa intención de expandir os asentamentos ilegais nos territorios ocupados e a anexión de terra palestina, non ocultan a súa oposición á independencia palestina e son tristemente célebres por incitar á violencia contra os palestinos. Malia a oposición internacional, a expansión dos asentamentos ilegais nos territorios ocupados é unha prioridade nacional para o Goberno de Netanyahu. Israel ocupou Cisxordania, Xerusalén leste e Gaza na Guerra dos Seis Días en 1967, e desde entón construíronse cando menos 250 asentamentos e postos de avanzada nos que hoxe viven 700.000 israelís, o 11% da poboación total xudía israelí. Na faixa de Gaza tamén se estableceron colonos, mais foron evacuados en 2005, cando as forzas israelís se retiraron dunha das áreas máis densamente poboadas do mundo, que soporta desde entón un bloqueo por terra, mar e aire. Os asentamentos israelís son comunidades xudías construídas en territorio palestino, ilegais baixo a lei internacional, que prohibe explicitamente que unha potencia ocupante constrúa asentamentos, desaloxe a poboación ou transfira a súa propia poboación aos territorios ocupados, feitos considerados crimes de guerra. Durante as últimas tres décadas o número de colonos israelís pasou de 260.000 a 700.000 Violación dos acordos de Oslo Nos últimos 30 anos o número de colonos israelís pasou de 260.000 a 700.000, o que supón unha violación dos Acordos de Oslo asinados por Yasser Arafat (OLP) e Yitzhak Rabin (Israel) en 1993. Estes acordos tiñan por obxectivo establecer un estado palestino na Cisxordania ocupada e en Gaza, mais o certo é que o colonialismo israelí non só ameaza a viabilidade dun futuro Estado palestino senón a mesma subsistencia dos palestinos. Malia estar fóra das fronteiras de Israel, os colonos teñen garantida a cidadanía israelí, poden votar nas eleccións israelís e reciben subsidios e protección do Goberno. Pola contra, os palestinos dos territorios ocupados están suxeitos á lei militar israelí. Amais, a chegada do novo Goberno israelí provocou un ‘envalentonamento’ dos colonos e un aumento da violencia contra os palestinos, que xa viña incrementándose de maneira constante nos últimos anos. Segundo información da ONU, entre 2010 e 2019 producíronse polo menos 2.955 ataques dos colonos, con 22 palestinos mortos e cando menos 1.258 feridos. Mais neste 2023 a violencia contra os palestinos está a acadar os seus maiores niveis desde 2006. Nos seis primeiros meses do ano nove palestinos foron asasinados polos colonos, mentres no mesmo período do ano pasado eran tres. Os ataques dos colonos contra os palestinos e as súas propiedades (casas, coches, cultivos e oliveiras…) contan coa complicidade do exército israelí, quen frecuentemente facilita, apoia ou participa nos mesmos, e gozan dunha impunidade total. O 93% das investigacións sobre ataques dos colonos en Cisxordania entre 2005 e 2022 foron pechados sen cargos, segundo a organización de dereitos humanos israelí Yesh Din, e só o 3% concluíron cunha condena. Israel vén apropiándose de terra palestina desde 1947 e mentres o Goberno israelí aplica unha política dirixida á completa anexión de Cisxordania (Xudía e Samaria para os xudeus), a Autoridade Palestina evidencia a súa máis absoluta incapacidade para protexer a súa poboación e a comunidade internacional segue mirando cara a outro lado. O que está a acontecer na actualidade é o resultado de décadas de impunidade de Israel e os colonos polos crimes cometidos contra os palestinos. O novo Goberno israelí vén recibindo críticas, incluso dos EUA e moitos outros aliados, en relación coa expansión dos asentamentos nos territorios palestinos ocupados, as demolicións de casas, os crecentes ataques dos colonos contra os palestinos, as provocacións e as incendiarias declaracións de ministros como Smotrich e Ben Gvir, os asaltos na mesquita de Al-Aqsa, a reforma xudicial…, mais ao fin e ao cabo todo queda en censuras irrelevantes ao non vir acompañadas de medidas concretas para deter os abusos israelís.