A bon sant ens hem encomanat!

No mes de decembro explotábanos na cara a ampliación do porto de València con nocturnidade e aleivosía. Unha decisión que mancomuna o PSOE, o PP e Vox. O PP levaba a proposta ao Congreso dos Deputados e Deputadas e o PSOE, póndolle un irrisorio laciño verde, aprobábaa. Dise en castelán que quen con nenos se deita, mexado se levanta. Pois iso. Non sorprende que o PP antepoña os intereses da economía depredadora aos da cidade e o medio ambiente. Tampouco que o faga Vox. A estas alturas, e co historial de decisións tomadas, tampouco nos debería sorprender que o faga o PSOE. Onde dixen digo, digo Diego. Todo está inventado no refraneiro. Un porto con cidade Para os lectores que non sexan expertos no tema, a ampliación do porto de València consiste en pór o porto de València en mans da multinacional MSC -compañía global de transporte marítimo de contedores- que, casualmente, move máis de 50% dos contedores do porto de València. Cambiar unha cidade con porto por un porto con cidade para contentar os intereses dunha empresa con sede en Suíza, á vez que se privatiza 47% da Mariña de València co obxectivo de financiar parte do proxecto. Un proxecto, ademais, que sen iniciarse conta con sobrecustos que ascenden a 22% do orzamento inicial e que implica, por tanto, un custo de 660 millóns de euros de investimento público. Máis a privada. Un proxecto, por seguir enumerando argumentos, que vai en contra de todos os obxectivos ambientais, sociais e económicos que poñen a cidadanía de València e das comarcas da contorna no centro; un proxecto sustentado nunha Declaración de Impacto Ambiental de 2007. O laciño verde. Estamos en 2024. Novamente gañan os grandes empresarios, perdemos a maioría. E é que mesmo o comité de empresa de CPS Iberian Valencia Terminal –traducido: a terminal pública da ampliación sur do porto de València– está a mobilizarse contra a ampliación norte porque esta implica unha redución do persoal dos estibadores portuarios nun 30%; ou o que é o mesmo, tirar á rúa 1.500 traballadores e traballadoras. Lembro outros momentos recentes na historia política en que o Partido Popular sustentaba as súas grandes obras faraónicas cargadas de sobrecustos na creación de emprego… Neste caso, nin iso. A decisión de ampliar o porto de València rompe con todos os modelos de cidade desta era e contradí todos os principios ecoloxistas Grandes capitais O porto de València estaba a converterse, ou iso se pretendía, nunha entidade pública para ser un proxecto de futuro, como exemplo de innovación, de xeración de emprego, de espazo de lecer e de riqueza para a cidade e a súa área metropolitana; pretendíase un porto que fose un espazo de inclusión e abertura. Pero parece que o PSOE, malia encher a boca falando de gobernos de progreso, cando están en xogo os beneficios dos grandes capitais, cambia o concepto de para quen implica progreso a súa xestión. Na súa man estaba poder paralizar unha ampliación que é unha aberración, que rompe con todos os modelos de cidade que se propoñen para esta era e que contradí todos os principios ecoloxistas e de preocupación polo medio ambiente. Este macroproxecto pon en grave perigo a Albufera de València e as praias do sur. Se comemos terreo ao mar, o mar comerá terreo á area. Pero ao PSOE, novamente, parece resultarlle máis importante que unha multinacional se lucre, que a vida dos valencianos e das valencianas. València, grazas a esta mancomunada decisión, empezará un proxecto máis típico de cidade contaminante do século XX que da Capital Verde Europea 2024. 4.000 camións ao día Ah! Esquecía, isto de cidade contaminante tamén ten moito que ver con que a ampliación do porto implica ampliar os carrís da V-30 -porque tal e como está agora deseñada é imposíbel que soporte o tránsito que require o porto ampliado- e, por tanto, o incremento na circulación en máis de 4.000 camións ao día por València. É entre indignante e triste que a cidade que durante oito anos foi posta no mapa polo modelo de carrís bici e peonalización, conseguindo o título de Capital Verde Europea, de súpeto se converta nun porto con cidade, nunha entrada masiva de camión, e nunha destrución das paraxes naturais para beneficio de grandes capitais. Boísima xestión do PSOE. Como dicimos en valenciano A bon sant ens hem encomanat! cun goberno no que o PSOE ten maioría e que non se avergoña de pactar con PP e Vox cando sexa preciso. As forzas da esquerda transformadora teñen nas súas mans decidir até onde están dispostas a ceder. Non pasaron nin dous meses da formación do Goberno.